Іван Крупко праінспектыраваў рэканструкцыю моста праз Прыпяць у Мазыры

Рэканструкцыю пачалі ў лістападзе мінулага года. Увесь гэты час будаўнікі працуюць нягледзячы на ўмовы надвор'я. Сёння таксама ўсе на аб'екце, хоць ідзе снег.

 

Работы праводзяцца з двух берагоў, цяпер тут працуюць больш за 50 чалавек, а задзейнічана не менш за 20 адзінак тэхнікі. Старшыня аблвыканкама азнаёміўся з ходам работ і пацікавіўся графікам мадэрнізацыі. 

– Не адстаем, ідзем нават з апераджэннем. Рух запусцім не пазней за 7 лістапада 2025 года, – абазначае тэрміны гендырэктар "Гомельаўтадора" Дзяніс Ясько.

Генпадрадчыкам выступіў ААТ "Мостастрой", асноўныя работы на аб'екце выконваюць Гомельскі філіял мостабудаўнічага ўпраўлення № 4 сумесна з Брэсцкім мостаатрадам № 58. 

Ужо разабралі агароджу, знялі асфальт, дэмантыравалі апоры асвятлення. Зараз дэмантыруюць пралёты і балкі. 

У працэсе рэканструкцыі моста зробяць новую пралётную пабудову, з'явіцца арка. Шырыня стане больш на тры метры, тратуары таксама павялічацца, каб пешаходам было камфортна.

– Тэрміны, якія акрэслілі сёння, павінны быць дакладна выкананы, – паставіў задачу кіраўнік рэгіёна. 

Старшыня Мазырскага райвыканкама Алена Паўлечка расказала, што рэйсы грамадскага транспарту, якія дадавалі для зручнасці мясцовых жыхароў, працуюць па раскладзе. А для жыхароў Зарэчнага мікрараёна арганізавалі дзяжурную брыгаду хуткай дапамогі пры паліклініцы, там жа можна прайсці ўсе асноўныя абследаванні. 

Завадчан падчас рамонту моста на работу і дадому дастаўляюць спецрэйсамі ад прадпрыемстваў. 

Дарожная абстаноўка стабільная, зваротаў, звязаных з закрыццём пуцеправода, ад мазыран стала паступаць менш.