Гомельшчыну наведала дэлегацыя з Манголіі

Госці з Манголіі ўчора пабывалі ў камбайнабудаўнічым холдынгу «Гомсельмаш» і на прадпрыемстве «Гомельагракамплект».

Днём раней у Мінску быў падпісаны кантракт з дзяржаўнай сельскагаспадарчай карпарацыяй Манголіі на пастаўку 10 самаходных касілак вытворчасці ААТ «Гомсельмаш» у гэтую краіну. 

Як паведаміў генеральны дырэктар холдынгу Аляксандр Новікаў, да гэтага пастаўкі ажыццяўляліся ў 2015 годзе, цяпер гэта супрацоўніцтва аднаўляецца. «Спачатку 10 касілак, пачынаем паказваць нашу тэхніку на мангольскім рынку, а далей развіццё могуць атрымаць пастаўкі збожжаўборачнай тэхнікі, якая карыстаецца попытам. Перспектывы ацэньваем станоўча», – сказаў Аляксандр Новікаў.

У Гомелі дэлегацыя Міністэрства харчавання, сельскай гаспадаркі і лёгкай прамысловасці Манголіі наведала пастаянна дзеючую выставу ў адкрытым акцыянерным таварыстве «Гомсельмаш», госці азнаёміліся з навейшымі ўзорамі тэхнікі, не толькі самаходнымі касілкамі, але і сучаснымі корма- і збожжаўборачнымі камбайнамі. 

Пабывалі дэлегаты і на ААТ «Гомельагракамплект». Прадпрыемства прапануе перадавыя тэхналогіі для сучасных жывёлагадоўчых гаспадарак і вырабляе шырокі спектр абсталявання. 

Асноўны напрамак – выпуск даільных і халадзільных установак. Да прыкладу, добра зарэкамендавалі сябе ўстаноўкі на 100 і 200 галоў з даеннем у малакаправод, а таксама тыпу «Ялінка» і «Паралель». 

Для гасцей таксама правялі змястоўную экскурсію па вытворчых цэхах, у размовах з кіраўнікамі прадпрыемства былі намечаны перспектывы далейшага супрацоўніцтва.