Фінансавай службе Беларусі – 105 гадоў

Са 105-годдзем службы эканамістаў рэгіёна павіншаваў губернатар Іван Крупко.

Фінансавая служба ў Беларусі сфарміравалася адной з першых – менш чым праз тыдзень пасля ўтварэння БССР. Падмуркам эканомікі краіны стаў заснаваны ў студзені 1919 года камісарыят фінансаў. 

Рэформаў было нямала, аднак па-ранейшаму фінансавыя органы з'яўляюцца важным звяном у структуры дзяржаўнага кіравання. 

Круглую дату эканамісты рэгіёна адсвяткавалі сёння ў аблвыканкаме. Павіншаваў упраўленне са 105-годдзем і губернатар Іван Крупко. Прафесіяналізм, уменне паглыбіцца ў дэталі і дакладнае разуменне, што за сухімі лічбамі стаяць чалавечыя лёсы, дазваляюць у тэрмін і ў поўным аб'ёме забяспечваць усе сацыяльна гарантаваныя абавязацельствы бюджэту – так ацаніў працу віноўнікаў урачыстасці старшыня аблвыканкама:

– Значэнне фінансавай сістэмы пераацаніць немагчыма, бо яе цэнтральнае звяно – бюджэт, які, у сваю чаргу, з'яўляецца асноўнай часткай незалежнасці нашай дзяржавы. Ваша сістэма вызначае рост і паступальнае развіццё кожнай сферы паасобку і нашай краіны ў цэлым.  

Кіраўнік рэгіёна падкрэсліў, што якаснае кіраванне фінансамі, узважаны падыход да размеркавання бюджэтных сродкаў дазваляе забяспечваць развіццё і стабільную дзейнасць устаноў аховы здароўя, адукацыі, культуры і спорту, весці актыўную інвестыцыйную палітыку, увасабляць у жыццё буйныя інфраструктурныя праекты, добраўпарадкоўваць нашы населеныя пункты, накіроўваць значныя сродкі на павышэнне дабрабыту насельніцтва. 

Губернатар уручыў лепшым работнікам упраўлення падзякі і ганаровыя граматы аблвыканкама, абласнога Савета дэпутатаў, Міністэрства фінансаў і юбілейныя медалі, якія выпушчаны да 85-годдзя вобласці. 

Падзяку за ахову эканамічнай бяспекі рэгіёна калегам выказала Марына Касцючэнка, начальнік галоўнага фінансавага ўпраўлення аблвыканкама. Яна таксама ўручыла ўзнагароды заслужаным работнікам і ветэранам галіны. 

У адказ ветэраны далі наказ моладзі трымаць марку, не падводзіць вобласць, органы дзяржаўнай улады, саміх сябе і краіну.