Ад керамікі да мэблі: у якіх сферах могуць супрацоўнічаць Гомель і Фергана

У выставачным цэнтры Ферганы падрыхтавалі экспазіцыю для дэлегацыі Гомельскай вобласці. Губернатар Іван Крупко азнаёміўся з прадукцыяй прадпрыемстваў розных раёнаў: свае тавары прэзентавалі бізнесмены і кіраўнікі прамысловых кластараў.

Аб перспектывах супрацоўніцтва ў лёгкай прамысловасці прадстаўнікі дэлегацыі Гомельшчыны гаварылі падчас наведвання агракластара Global Textile у Куштэпінскім раёне Ферганскай вобласці. Тут вырабляюць пражу, суровае і фарбаванае трыкатажнае палатно. Кампанія пачала вытворчасць высакаякаснай кампактнай пражы ў студзені 2018 года.

Затым губернатар наведаў маладзёжны эканамічны кластар, дзе прадпрымальнікі расказалі аб вытворчасці абутку для дзяцей і дарослых, пашыве адзення.

Яшчэ адна кропка ў маршруце – ТАА Golden Valley Fasteners. Завод з'яўляецца найбуйнейшым у краіне вытворцам металічных крапежных вырабаў. Кампанія гатова да супрацоўніцтва з новымі партнёрамі і запрашае гомельскіх калег да ўзаемавыгаднага дыялогу.

Магчымасць стварэння сумеснай вытворчасці мэблі абмеркавалі з ферганскімі дрэваапрацоўшчыкамі.

– Гомельшчына багатая лясамі, у нас ёсць сыравіна і людзі гатовыя да працы на ўзбекскім і іншых рынках. Таму не сумняваюся, што нашы дамоўленасці здзяйсняльныя, – сказаў старшыня аблвыканкама, прапанаваўшы больш цеснае супрацоўніцтва.