Выбраць прафесію па душы і вярнуцца на малую радзіму: губернатар павіншаваў школьнікаў Чачэрскага раёна з Днём ведаў

За парты ў Залескай сярэдняй школе Чачэрскага раёна сядуць 117 навучэнцаў, 14 з іх першакласнікі.

З пачаткам новага навучальнага года хлопчыкаў і дзяўчынак, педагогаў і бацькоў павіншаваў старшыня аблвыканкама Іван Крупко:

– Гэта захапляючае падарожжа ў свет ведаў і адкрыццяў, новы этап жыцця на шляху інтэлектуальнага, духоўнага і спартыўнага росту. Мне, як кіраўніку вобласці, важна, каб дзеці вучыліся, выхоўваліся і развіваліся ў роўных умовах. Выпускнікі вашай школы гэтага года, якія ўсе паступілі ў прэстыжныя ВНУ краіны, яскравы прыклад таго, што гэта магчыма.

Кіраўнік рэгіёна падкрэсліў: галоўнае – каб школьнікі маглі атрымаць поўны аб'ём ведаў, які дасць магчымасць выбраць прафесію па душы і вярнуцца працаваць на малую радзіму.

Залеская сярэдняя школа больш за іншых у Чачэрскім раёне пацярпела падчас урагану: тут сарвала дах над спартыўнай залай. Аднак намаганнямі абласных органаў улады, мясцовых педагогаў і бацькоў работы па аднаўленні будынка ўдалося завяршыць да пачатку навучальнага года.

З арганізацыяй навучальнага працэсу ва ўстанове адукацыі азнаёміўся губернатар. Іван Крупко ацаніў добраўпарадкаванне прысядзібнай тэрыторыі, дзе разбіты сад і ўстаноўлены цяпліцы, унутранае тэхнічнае напаўненне школы. Абмеркавалі таксама развіццё спартыўнага комплексу.

Для далейшага ўмацавання матэрыяльна-тэхнічнай базы школы кіраўнік рэгіёна ўручыў дырэктару падарункавы сертыфікат.