Удзел у нарадзе прыняў памочнік Прэзідэнта – інспектар па Гомельскай вобласці Руслан Пархамовіч.

На парадку дня – будучае развіццё Гомеля: пашырэнне вуліц, знос старых прыватных дамоў, замена сетак, будаўніцтва шматкватэрнага жылля і індывідуальных дамоў, пашырэнне дарог і тратуараў, стварэнне камфортнай інфраструктуры. 

– Ваша задача – вызначыць праграму зносу на бліжэйшыя трыццаць гадоў, схематычна пазначыць перспектыўныя ўчасткі пад індывідуальнае жыллёвае будаўніцтва. Людзі павінны разумець, дзе ў бліжэйшы час не будзе шматкватэрнай забудовы, каб рэканструяваць сваё жыллё, праводзіць мадэрнізацыю і ўзводзіць новыя дамы, – даручыў мэру і кіраўнікам адміністрацый абласнога цэнтра губернатар. 

У бліжэйшыя гады ў Гомелі рэнавацыі падлягаюць 12 пляцовак. Вызначаны зоны пад шматкватэрныя дамы, іх будаўніцтва ажыццяўляецца ў адпаведнасці з генеральным планам.  

Да пляцовак, на якіх прадугледжана індывідуальная жылая забудова, неабходна аператыўна правесці сучасныя сеткі і неабходныя камунікацыі, падкрэсліў кіраўнік рэгіёна. Пры планаванні на будучыню не павінна быць абстракцыі: патрэбна канкрэтыка, падсумаваў Іван Крупко.