Добраўпарадкаванню малых населеных пунктаў на Гомельшчыне надаюць асаблівую ўвагу. У гэтым годзе ў праграму ператварэння патрапілі гарадскія пасёлкі Акцябрскі і Азарычы Калінкавіцкага раёна.

Як прайшоў рамонт сацыяльных аб'ектаў гарпасёлка Азарычы, старшыня Калінкавіцкага райвыканкама Сяргей Гвоздзь на месцы расказаў губернатару Івану Крупко.

Першай кропкай стаў мясцовы Дом культуры. Яго абнавілі цалкам, цяпер у будынку ёсць прасторнае фае, гардэроб, актавая зала на 248 месцаў, кабінеты для заняткаў творчасцю. Усяго ў Азарычах жыве больш за 1100 чалавек, але зона абслугоўвання значна больш – работнікі культуры абслугоўваюць у тым ліку суседнія вёскі і населеныя пункты, ездзяць па сацыяльным маршруце, на мясцовыя святы, выступаюць падчас уборачнай. 

Такі вялікі культурны цэнтр вольнага часу – рэдкасць для маленькага гарпасёлка. Таму, акцэнтаваў увагу старшыня аблвыканкама, важна знаходзіць новыя формы работы з насельніцтвам, прыцягваць людзей да заняткаў творчасцю. Адным словам, выкарыстоўваць адрамантаваныя плошчы па максімуму:

– Ствараючы абноўлены мемарыял у Азарычах, мы разумелі, што патрэбны і іншыя дзеючыя пункты для турыстаў. Таму сацыяльныя аб'екты павінны быць на самым высокім узроўні, каб іх можна было ўключыць у маршрут наведвання.

Пераўтварэнні адбыліся і ў амбулаторыі ўрача агульнай практыкі Азарыцкай бальніцы. Ад рэгістратуры да палат сястрынскага догляду – парадак будаўнікі навялі ўсюды. Для аказання дадатковай дапамогі набылі перасоўны медыцынскі комплекс. Мясцовыя лекары абслугоўваюць пацыентаў з 21 населенага пункта раёна, а гэта больш за 2500 чалавек. У Азарыцкай бальніцы функцыяніруюць кабінеты ўрача агульнай практыкі, гінеколага, здаровага дзіцяці. Ёсць стаматалогія, фізіятэрапія, лабараторыя, дзённы стацыянар. У наступным годзе плануюць такім жа сучасным зрабіць другое крыло. Тады будзе магчымасць павялічыць ложкі сястрынскага догляду і павысіць камфорт для пацыентаў.

Добраўпарадкаванне закранула і сістэму адукацыі. Рамонт зрабілі ў дзіцячым садку: мадэрнізіравалі некаторыя памяшканні, сховішча для агародніны, прывялі ў парадак адмостку. У мясцовай школе з'явілася пляцоўка са штучным ненатуральным газонам, дзе ў цёплы час года дзеці змогуць гуляць у футбол, а зімой заліваць каток і займацца хакеем. Ва ўстанове адукацыі абнавілі харчаблок. З цягам часу ўнутры школы таксама правядуць рамонтныя работы.