Сёння з калектывам Хойніцкага завода ЖБВ сустрэўся старшыня аблвыканкама Іван Крупко.

– Радуе, што прадпрыемства загружана пад поўныя аб'ёмы. Для забеспячэння насельніцтва якасным жыллём і выхаду на новыя рынкі Расіі неабходна пашыраць вытворчасць.

Час не стаіць на месцы, таму трэба асвойваць сучасныя тэхналогіі. Кожны з вас сваёй работай уносіць сваю лепту ў будаўніцтва мірнай, моцнай і незалежнай Беларусі. Трэба рабіць усё неабходнае для міру, – падкрэсліў губернатар.

Падчас адкрытага дыялогу гаварылі аб эканамічнай і нацыянальнай бяспецы, абноўленай Канстытуцыі, мірных ініцыятывах Беларусі. Кіраўнік рэгіёна адказаў на пытанні з залы.

Работнікі завода пацікавіліся ў губернатара, якія перспектывы ў Гомельшчыны на міжнародных рынках. У першую чаргу, гэта рэгіёны Расіі і Кітая, з якімі вядзецца планамерная работа, адказаў Іван Крупко:

– Стратэгічна працуем з краінамі СНД, ЕАЭС. Прадумваем выгадную для абодвух бакоў лагістыку паставак прадукцыі. Мы павінны быць канкурэнтаздольнымі і на ўнутраным, і на знешнім рынку. Перспектывы добрыя, шмат ёсць праектаў на будучыню. Будзем плённа працаваць.

Прадпрыемствы рэгіёна пастаянна вядуць работу па пашырэнні геаграфіі паставак. Новымі экспартнымі рынкамі ў студзені – верасні 2024 года для нас сталі 13 краін, у іх ліку Сінгапур, Чылі, Японія, Бразілія, Гвінея, Кувейт, Ліван, Нігер, Куба. Мы супрацоўнічаем з 67 краінамі па таварах і з 116 – па паслугах.

Хвалюе мясцовых жыхароў і будаўніцтва водапаніжальных збудаванняў, паколькі ў райцэнтры часта назіраюцца паводкавыя з'явы.

– У сувязі з абгрунтаванымі зваротамі грамадзян ужо распрацоўваецца перадпраектная дакументацыя па інжынерных мерапрыемствах па абароне ад падтапленняў Хойнікаў, яна будзе гатова да канца снежня. Для прадухілення падтапленняў плануецца скідваць ваду за межы жылой забудовы па закрытым калектарам ў існуючы меліярацыйны канал, – расказаў губернатар.

Абмеркавалі таксама пытанні рамонту дарог, ільгот для маладых спецыялістаў, падаўжэння дзяржпраграм.