Да першага намесніка старшыні аблвыканкама Дзмітрыя Петражыцкага датэлефанаваліся 24 жыхары рэгіёну. Тэматыка зваротаў была разнастайнай, шырокай геаграфія званкоў, шмат прагучала бытавых пытанняў.

Гамяльчанін Міхаіл Іванавіч не знайшоў у продажы свіных капытоў і вырашыў паведаміць пра гэта ў аблвыканкам. Падставай для званка Кацярыны Міхайлаўны з гарпасёлка Камарын Брагінскага раёна стала з'яўленне ліс у населеным пункце. Марыя Дзмітрыеўна з аграгарадка Кашэвічы Петрыкаўскага раёна прасіла пашырыць асартымент прамысловых і рытуальных тавараў у комплексна-прыёмным пункце, наракала, што труну купіць у вёсцы няма дзе.

Міхаіл Захаравіч з Гомеля ў сэрцах агучыў сваю праблему – холадна ў доме. Безвынікова б'ецца як рыба аб лёд, звяртаецца ў ЖКГ, але штогод з пачаткам ацяпляльнага сезона сітуацыя паўтараецца. Гамяльчанін Сяргей Адамавіч расказаў, што ў аграгарадку Крупец Добрушскага раёна па вуліцы Калгаснай каля месяца няспраўная калонка на тэрыторыі агульнага карыстання, пажылым людзям даводзіцца далёка хадзіць па ваду, прасіў дапамагчы вырашыць пытанне.

Людміла Аляксандраўна і Аляксандр Гаўрылавіч занепакоеныя закрыццём магазіна ў Жгунскай Будзе Добрушскага раёна. Аўтакрама прыязджае, але раскладам і маршрутам людзі незадаволеныя. Акрамя таго, жанчына агучыла тэму ўборкі на могілках векавых аварыйных соснаў, якія пры падзенні могуць прынесці матэрыяльную шкоду.

Магчымасцю асабіста пагутарыць з Дзмітрыем Петражыцкім скарысталася Алена Іванаўна, якая расказала аб адсутнасці ацяплення ў Старабеліцкім ФАПе, што дастаўляе нязручнасці медработнікам і жыхарам. Падстава для званка Алены Раманаўны і Тамары Іванаўны з пасёлка Камунар Буда-Кашалёўскага раёна – адсутнасць ужо на працягу трох тыдняў гарачай вады ў іх доме. Звароты ў ЖКГ і райвыканкам выніку не далі, людзі занепакоеныя.

Кожнага, хто звярнуўся, уважліва выслухалі. Усе атрымалі тлумачэнні, а пытанні, якія патрабуюць дэталёвага аналізу, узяты на кантроль.