Унікальны манумент, абноўлены танк, Алея Зорак: плошча Паўстання ў Гомелі адкрыта пасля рэканструкцыі

Напярэдадні Дня Незалежнасці пасля рэканструкцыі ў Гомелі адкрылі плошчу Паўстання, на месцы якой у 1941–1943 гадах размяшчаўся Цэнтральны перасыльны лагер для савецкіх ваеннапалонных «Дулаг-121». За два гады ў лагеры фашысты знішчылі больш за 100 тысяч чалавек, частку з іх пахавалі тут. 

Рамонтныя работы пачалі летась, тэрыторыю поўнасцю абнавілі. Цяпер плошча Паўстання і два скверы – каля фабрыкі "8 Сакавіка" і цырка – выкананы ў адзіным стылі. Парковачных месцаў стала менш у два разы, прастору, якая вызвалілася, заняла тратуарная плітка, у яе ўманціравалі свяцільні. Каля падножжа танка Т-34, які пасля рэстаўрацыі вярнуўся на пастамент, аформілі клумбу. Архітэктурнае падсвятленне падкрэслівае моц баявой машыны, а ў цэнтры пастамента, куды будуць ускладацца кветкі, выява ордэна Айчыны.

Па перыметры плошчы і ў скверах устаноўлены лаўкі, з'явілася Алея Зорак, высаджаны чырвоныя клёны. Адной з цэнтральных частак абноўленай тэрыторыі стаў помнік ахвярам генацыду беларускага народа "Дрэва жыцця". Гэта першы такі мемарыял, устаноўлены ў Беларусі па ініцыятыве работнікаў пракуратуры. Амаль трохмятровую бронзавую скульптуру стварылі майстры Іван Казак і Валерый Рыбакоў. Па іх задуме, чалавечыя рукі вырываюцца з зямлі. Пасля Гомеля "Дрэвы жыцця" з'явяцца ва ўсіх абласных гарадах рэспублікі.

– Такі ўнікальны народны сімвал будзе ўсталяваны ў кожным абласным цэнтры. У Гомелі мы зрабілі гэта першымі. Папярэдне сумесна з жыхарамі рэгіёна вызначылі месца ўстаноўкі помніка і сумеснымі намаганнямі адрэстаўравалі плошчу Паўстання. Устаноўка гэтага знака – чарговы этап у крымінальнай справе Генеральнай пракуратуры ў рамках крымінальнай справы аб фактах учынення нацыстамі злачынстваў генацыду мірнага насельніцтва ў нашай рэспубліцы, – падкрэсліў Іван Крупко падчас адкрыцця.

Кіраўнік рэгіёна ўручыў юбілейны знак "80 гадоў вызвалення Гомельскай вобласці ад нямецка-фашысцкіх захопнікаў" намесніку Генеральнага пракурора Генадзю Дыско.

– Найважнейшае гістарычнае мерапрыемства па ўшанаванні памяці, задача якога паказаць моладзі, якім коштам была заваяваная Перамога. Шануйце мірнае неба над галавой. Пакуль мы захоўваем нашу гісторыю, будзем жыць і далей у спакойным грамадстве з верай у заўтрашні дзень, – канстатаваў кіраўнік спраў Прэзідэнта Юрый Назараў.

Удзельнікі мітынгу заклалі ў падмурак помніка капсулу з падзякай Героям Перамогі і пасланнем нашчадкам: берагчы праўду і памяць аб Вялікай Айчыннай вайне.