У фае заводаўпраўлення прайшла медыяпрэзентацыя ведамасных і карпаратыўных СМІ Гомельшчыны.

Падчас круглага стала абмеркавалі развіццё і ўдасканаленне працы СМІ пры буйных прадпрыемствах, арганізацыях. У вобласці магутны прамысловы патэнцыял, у шматлікіх такіх газет доўгі гістарычны шлях, слаўныя традыцыі. Ёсць свае выданні, друкаваныя і электронныя таксама ў вядучых ВНУ Гомельшчыны. Сумарны тыраж, а значыць, і ахоп аўдыторыі ў такіх газет даволі вялікія.

Зразумела, журналісты на месцах закранаюць не толькі профільныя тэмы, справы прамысловыя ці ўніверсітэцкія. Асвятляюць і злабадзённую праблематыку, у тым ліку грамадска-палітычныя тэмы, у абавязковым парадку – пытанні, якія хвалююць моладзь. Працуюць ва ўсіх жанрах журналістыкі.

Як адзначыў міністр інфармацыі Уладзімір Пярцоў, СМІ ў працоўных, студэнцкіх калектывах не павінны ўпускаць сваіх чытачоў, якасна спаталяць іх інфармацыйны голад, што называецца, "трымаць парадак дня". Абавязкова адаптаваць свой кантэнт пад інтэрнэт-версіі выданняў, актыўна выкарыстоўваць месэнджары, сацсеткі – гэта асабліва важна для маладога пакалення. Інакш інфармацыйныя прабелы запоўняць сумніўныя альтэрнатыўныя недажурналісты, якія прапагандуюць зусім іншы парадак дня, навязаны з-за межаў нашай краіны.