Ва ўстанове правялі рэспубліканскую дабрачынную акцыю "Ад усёй душы". Удзел ва ўрачыстых мерапрыемствах прынялі старшыня аблвыканкама Іван Крупко, міністр працы і сацыяльнай абароны Наталля Паўлючэнка.

Сустрэча ў "Радушным", падкрэсліў губернатар, выдатная магчымасць падарыць цяпло нашых сэрцаў людзям залатога ўзросту. Бо ўвагі не бывае многа, а ўсебаковая падтрымка і шчыры клопат аб старэйшым пакаленні былі і будуць прыярытэтнай задачай сацыяльнай палітыкі нашай дзяржавы.

Веткаўскі сацыяльны пансіянат "Радушны" пасля капітальнага рамонту ўяўляе сабой шматфункцыянальны комплекс, у якім для 123 людзей старэйшага пакалення створаны камфортныя ўмовы, якія максімальна набліжаны да хатніх умоў.

Міністр працы і сацыяльнай абароны Наталля Паўлючэнка адзначыла, што шанаванне і клопат пра старэйшых у векавых традыцыях беларусаў. Цяпло і любоў да бацькоў, бабуль і дзядуляў перадаюцца з пакалення ў пакаленне. Мудры падыход безумоўна працягваецца і ў сацыяльных установах, падобных "Радушнаму".

Наталля Паўлючэнка таксама звярнула ўвагу на камфортныя ўмовы працы, створаныя для персаналу пансіяната, а яшчэ – на шырокія магчымасці для раскрыцця талентаў і творчых магчымасцяў людзей, якія там пражываюць.

Дарэчы, ва ўстанове пастаяльцы працуюць у майстэрнях, вырабляюць вырабы з гіпсу, саломы, шыюць, пішуць карціны. Удасканальваюцца і ў кулінарыі.

Любоў Міхайлаўна Арлова, якая пражывае ў "Радушным", ад усёй душы падзякавала кіраўніцтву краіны і вобласці, будаўнікам, сацыяльным работнікам за выдатны падарунак – адноўлены пансіянат. "Тут мы адчуваем сябе як дома", – прызналася жанчына.

Рэспубліканская акцыя "Ад усёй душы" сабрала ў пансіянаце прадстаўнікоў розных пакаленняў, але падарыла ўсім атмасферу яднання і сапраўднага свята.

Як адзначыў старшыня аблвыканкама Іван Крупко, ні адно з дасягненняў людзей залатога ўзросту не забыта – іх рукамі будавалася наша краіна, мы бясконца ўдзячны ім за ўклад у развіццё Радзімы.

У рамках акцыі адбылося ўручэнне заслужаным грамадзянам юбілейных знакаў "80 гадоў вызвалення Гомельскай вобласці ад нямецка-фашысцкіх захопнікаў".

У прасторным памяшканні сталовай пансіяната зладзілі яркі канцэрт. Музычнымі талентамі дзяліліся не толькі запрошаныя артысты, але і самі пастаяльцы. Акцыя "Ад усёй душы" стала выдатнай нагодай сказаць дзякуй людзям мудрага пакалення.