Традыцыйна ўрачыстасці, прысвечаныя дню памяці падзвіжніка веры і набожнасці праведнага Іаана Кармянскага, праводзяцца ў Свята-Іаана-Кармянскім жаночым манастыры Добрушскага раёна. 

Набажэнства ўзначаліў Веніямін, мітрапаліт Мінскі і Заслаўскі, Патрыяршы Экзарх усяе Беларусі. Літургія завяршылася хрэсным ходам.

Неўміручыя рэшткі святога знайшлі ў ліпені 1991 года пры раскопках падмурка былой Свята-Мікольскай царквы. Непрыкметны працаўнік на ніве Божай у 1999 годзе быў прылічаны да ліку мясцовашанаваных святых Беларускай праваслаўнай царквы.

Сотні беларусаў і турыстаў з іншых краін прыязджаюць у Карму, каб памаліцца аб здароўі сваіх родных і блізкіх у надзеі на дапамогу святога праведніка. На ўрачыстасці з нагоды святкавання дня памяці святога ў Іаана-Кармянскім жаночым манастыры сабраліся паломнікі і праваслаўныя, духавенства з усёй краіны. Далучыўся да іх і старшыня аблвыканкама Іван Крупко:

– Беларускі народ заўсёды адкрыты сэрцам да тых, хто прыходзіць з мірам. Беларуская праваслаўная царква і Прэзідэнт Беларусі на ўсіх узроўнях змагаюцца і адстойваюць нашы традыцыйныя каштоўнасці – патрыятызм, крэпасць сям'і і міласэрнасць. Сумесна мы шмат чаго робім у краіне на свецкай і духоўнай ніве. Упэўнены, што пазітыўны імпульс гэтага стваральнага супрацоўніцтва захаваецца на доўгія гады і будзе верна служыць народу, Айчыне і нашай роднай вобласці. 

Ад сябе асабіста і ад усіх гамяльчан губернатар выказаў падзяку Веніяміну, мітрапаліту Мінскаму і Заслаўскаму, Патрыяршаму Экзарху ўсяе Беларусі, які ўзначаліў богаслужэнне:

– Дзякуй, што ў такія памятныя дні знаходзіцеся на Гомельшчыне, сваім словам моліцеся за Беларусь, наш народ, мір, здароўе і росквіт краіны.

Кіраўнік рэгіёна ўручыў уладыку нагрудны знак "80 год вызвалення Гомельскай вобласці ад нямецка-фашысцкіх захопнікаў" за духоўнае выхаванне моладзі, а таксама падтрымку праектаў патрыятычнай накіраванасці. Свята-Іаана-Кармянскаму жаночаму манастыру Іван Крупко перадаў ікону «Гасподзь Усёмагутны».

– Жыццё святога праведнага Іаана Кармянскага – арыенцір для кожнага святара. У самых простых умовах ён шмат чаго дасягнуў. Па розных патрэбах ён звяртаўся да Бога і знаходзіў водгук у сваіх малітвах. А ў апошнія гады быў фізічна слабы, але бадзёры духам, мог выганяць нячыстых духаў з людзей, для чаго патрэбна вялікая духоўная сіла, – звярнуўся да праваслаўных вернікаў мітрапаліт.

Уладыка нагадаў асноўныя прынцыпы жыцця святога: рабіць добрую справу незалежна ад таго, як чалавек да вас ставіцца; не рабіць таго, чаго сабе не жадаеш:

– Айцец Іаан меў спачувальную душу, і кожны чалавек яму быў блізкі. Гэта і ёсць духоўныя прынцыпы, якімі жыў і працягвае жыць беларускі народ. Яны павінны як мага глыбей пранікаць у сэрцы чалавечыя. Мы звяртаемся да праведнага Іаана не толькі з малітвай аб міры, але і з просьбамі аб тым, што трэба Гомельшчыне і Беларусі. Мы вучымся ў яго і стараемся дапамагаць адзін аднаму, каб ісці праведным шляхам – шляхам выратавання.