Пасля таго, як у пачатку мінулага года ў аграгарадку знеслі аварыйны будынак 1956 года пабудовы, мясцовыя жыхары ўважліва сачылі за працэсам ўзвядзення сучаснага школьнага корпусу.

Аграгарадок актыўна развіваецца і расце, тут паступова павялічваецца колькасць дзяцей школьнага ўзросту, таму патрэбнасць у пашырэнні ўстановы адукацыі наспела даўно – яшчэ з 2010 года, калі стары будынак перасталі эксплуатаваць, прыйшлося туліцца ў адным корпусе. Сітуацыю змяніў званок на прамую лінію старшыні аблвыканкама Івану Крупко: педагогі папрасілі дапамагчы з мадэрнізацыяй навучальнай установы.

Кіраўнік рэгіёна ідэю падтрымаў: будоўлю пачалі ў пачатку 2023 года ў рамках інвестыцыйнай праграмы Гомельскай вобласці. За 12 месяцаў у Камунары вырас двухпавярховы корпус з пераходнай галерэяй. Тут прадугледжаны спартыўная і актавая залы, майстэрня для хлопчыкаў, харчаблок, кабінеты хіміі, інфарматыкі, біялогіі, на другім паверсе абсталявана аддзяленне для першакласнікаў са спальнымі, ігравымі памяшканнямі, раздзявалкамі. Не забыліся і пра безбар'ернае асяроддзе – галоўны ўваход у школу абсталявалі пандусам з поручнямі, ёсць ліфт.

– Адкрываючы сёння мадэрнізаваную школу з новым корпусам, мы ўступаем у Год якасці. Якасць вашага навучання – гэта выдатныя веды і добрыя справы на карысць нашай роднай і любімай Беларусі. Жадаю вам моцнага здароўя, настойлівасці і поспехаў. Няхай школа стане для вас сапраўды другім домам, а навучэнцы, настаўнікі і бацькі – сапраўднай сям'ёй. У добры шлях! – пажадаў губернатар на-васёлам.

Старшыня аблвыканкама Іван Крупко перадаў дырэктару сертыфікат на набыццё посудамыйнай машыны і запэўніў, што ўлетку ў двары школы пастараюцца ўладкаваць шматфункцыянальную спартыўную пляцоўку. Старшыня Буда-Кашалёўскага райвыканкама Анатоль Гапонік падарыў установе адукацыі сертыфікат на камп'ютарную тэхніку.