Генеральным дырэктарам Гомельскага дзяржаўнага вытворчага лесагаспадарчага аб'яднання стаў Ігар Дзягцярык. Сёння калектыву яго прадставіў міністр лясной гаспадаркі Аляксандр Кулік. Да гэтага Ігар Мікалаевіч працаваў дырэктарам Гомельскага доследнага лясгаса.

 

Міністр падзякаваў за работу папярэдняга гендырэктара Гомельскага дзяржаўнага вытворчага лесагаспадарчага аб'яднання Юрыя Шумскага, абранага старшынёй Беларускага прафсаюза работнікаў лесу і прыродакарыстання:

– Вы прынялі аб'яднанне ў няпросты час. У такіх умовах як ніколі выяўляецца мудрасць кіраўніка. Зроблена нямала, асноўныя задачы дзяржавы былі выкананы. Упэўнены, ваш вопыт спатрэбіцца і на новай пасадзе.

За супрацоўніцтва і плённую працу, у тым ліку па ліквідацыі наступстваў урагану на Гомельшчыне Юрыя Шумскага падзякаваў старшыня аблвыканкама Іван Крупко.

– Поспехаў вам на новай пасадзе, – пажадаў губернатар.

Прагучала і пажаданне Ігару Дзягцярыку:

– Вы ініцыятыўны і адказны. Спадзяюся, што работа, якая была праведзена ў Гомельскім вопытным лясгасе, будзе прадоўжана ва ўсёй вобласці.

У ходзе пасяджэння абмеркавалі таксама перспектывы і планы далейшага развіцця лясной гаспадаркі.

– Гомельскае дзяржаўнае вытворчае лесагаспадарчае аб'яднанне павінна быць органам, які суправаджае і кантралюе галіну. Яго роля павінна быць бачна ў рабоце ўсіх лясгасаў. Напружвацца будуць усе. Няма невырашальных задач, ёсць дрэнныя выканаўцы. У нас павінны быць лепшыя паказчыкі, – падкрэсліў у слове ў адказ прызначаны генеральны дырэктар.