Галоўнай тэмай снежаньскай сустрэчы стала пытанне кадравага забеспячэння. Удзельнікі абмеркавалі вынікі прыёмнай кампаніі і перспектывы яе арганізацыі ў будучым годзе, а на выставе азнаёміліся з існуючым патэнцыялам і дасягненнямі вядучага ўніверсітэта рэгіёна.

У дыялогу прынялі ўдзел не толькі рэктары ўсіх ВНУ, але і прадстаўнікі аблвыканкама, галоўнага ўпраўлення адукацыі, начальнікі аддзелаў адукацыі, спорту і турызму гаррайвыканкамаў і адміністрацый раёнаў Гомеля. 

Гаворачы аб падрыхтоўцы маладых спецыялістаў, намеснік старшыні аблвыканкама Дзмітрый Алейнікаў адзначыў, што за апошнія пяць гадоў фіксуецца адмоўная дынаміка колькасці навучэнцаў у вышэйшых навучальных установах вобласці – ад 1% да ўзроўню 2018 года ў Мазырскім дзяржаўным педуніверсітэце імя І. П. Шамякіна да 40% у Беларускім гандлёва-эканамічным універсітэце спажыўкааперацыі. 

Адзін з найбольш перспектыўных напрамкаў – мэтавая падрыхтоўка. У 2023 годзе на ўмовах мэтавай падрыхтоўкі ва ўстановы вышэйшай і сярэдняй спецыяльнай адукацыі паступілі 230 чалавек, з іх ва ўстановы вышэйшай адукацыі – 121. Аналіз замацавання маладых спецыялістаў паказвае штогадовы прырост і сёння гэта 83% па вобласці. Па выніках сацыялагічнага даследавання, праведзенага лабараторыяй Гомельскага дзяржаўнага тэхнічнага ўніверсітэта імя П. В. Сухога, 25% моладзі ў асноўных спосабах працаўладкавання бачыць размеркаванне пасля ВНУ. Дзмітрый Алейнікаў перакананы, што паміж установамі агульнай сярэдняй адукацыі і вышэйшай школай павінна быць цеснае ўзаемадзеянне ў вырашэнні пытанняў кадравага забеспячэння.

ГДУ імя Ф. Скарыны абраны пляцоўкай для правядзення форуму невыпадкова. Па словах рэктара ВНУ Сяргея Хахомава, з 11 факультэтаў толькі на двух не вядзецца падрыхтоўка педагагічных кадраў. Каля 60% выпускнікоў – тыя, хто вучыць і будзе вучыць нашых дзяцей, а якасць падрыхтоўкі выпускнікоў уплывае, у тым ліку, і на будучыню ўсяго рэгіёна.