– Паважаныя жыхары Гомельскай вобласці! Вы ўсе ведаеце, як сур'ёзна пацярпеў наш рэгіён 14 ліпеня ў выніку ўраганнага ветру, хуткасць якога часам дасягала 29 метраў за секунду. Самае трагічнае, што не абышлося без чалавечых ахвяр. Прыношу шчырыя спачуванні родным і блізкім загінулых. Нягледзячы на кругласутачную работу ўсіх зацікаўленых службаў, на раніцу панядзелка застаюцца абясточанымі Мазыр, Ельск, Калінкавічы, Лельчыцы, Нароўля. Усяго ж парушана электразабеспячэнне каля 1150 населеных пунктаў.

Прынята рашэнне аб'явіць у вобласці надзвычайную сітуацыю і сфарміраваць аператыўны штаб. Усе спецыяльныя службы: энергетыкі, ратавальнікі, ляснікі, супрацоўнікі ЖКГ, ДАІ і іншыя працягваюць працаваць у кругласутачным рэжыме. Ствараюцца дадатковыя брыгады па расчыстцы лясных завалаў з мэтай максімальна больш хуткага доступу энергетыкам да ліній электраперадачы. У кругласутачным рэжыме пацярпелае насельніцтва будзе забяспечана пітной вадой да поўнага аднаўлення водазабеспячэння. Таксама мною дадзены даручэнні старшыням сельскіх Саветаў вывучыць праблемы кожнага домаўладання. Людзі не павінны заставацца сам-насам са сваёй бядой. Акрамя таго, цяпер фарміруюцца будаўнічыя брыгады, якія зоймуцца аднаўленнем разбураных непагодай аб'ектаў. 

Паважаныя жыхары вобласці, мы робім усё магчымае для максімальна больш хуткага аднаўлення працы ўсіх пашкоджаных сістэм жыццезабеспячэння. Аб ходзе аднаўленчых работ будзем інфармаваць вас аператыўна.

Штаб па ліквідацыі наступстваў непагоды губернатар Іван Крупко праводзіць з аператыўнымі службамі і старшынямі райвыканкамаў раз на некалькі гадзін. Галоўнае пытанне – што трэба раёнам для ліквідацыі наступстваў стыхіі. 

Аднаўленне работы вытворчасцей, дастаўка людзям вады і прадуктаў па неабходнасці, забеспячэнне харчаваннем аб'ектаў сацыяльнай інфраструктуры, аднаўленне электра- і водазабеспячэння – тое, што знаходзіцца на асаблівым кантролі ва ўсіх службаў.