Вось ужо шмат гадоў 7 студзеня ў абласным грамадска-культурным цэнтры разам сустракаюць светлы дзень Ражства Хрыстова. Сёлета адсвяткаваць светлы дзень сабралася поўная зала.

У фае грамадска-культурнага цэнтра зімовую казку зладзілі цэнтры народнай творчасці і дома рамёстваў, дзіцячыя студыі: на выставе прэзентавалі ахоўваючых Беларусь анёлаў, храмы, ёлачныя цацкі і сувеніры з самых розных матэрыялаў.

Традыцыйна са словамі віншавання да гледачоў звярнуўся архіепіскап Гомельскі і Жлобінскі Стэфан:

– Нас мільёны веруючых сэрцаў, і гэтыя сэрцы кожную хвіліну жывуць з Богам, узносяць свае малітвы да яго, і гэта дае духоўную сілу чалавеку, каб здзяйсняць подзвіг любові на зямлі. Быць бліжэй адзін да аднаго, з павагай ставіцца адзін да аднаго, тварыць добрыя справы, да якіх заклікаў Хрыстос і яго паслядоўнікі, апосталы. Так давайце разам пры сустрэчы ўсміхацца і радавацца, каб нашы ясныя вочы казалі, што ў нас жыве любоў у Хрысце. Давайце любіць Радзіму, нашу зямлю, светлую Белую Русь. Здароўя, міру, дабрабыту ўсім вам.