Будаўніцтва плавальнага басейна "Дэльфін" у Савецкім раёне Гомеля стартавала ў 2023 годзе за кошт сродкаў абласнога бюджэту ў рамках рэгіянальнай інвестпраграмы.

Сёння новы аб'ект па вуліцы Валгаградскай разам з юнымі спартсменамі адкрылі старшыня Савета Рэспублікі Наталля Качанава, старшыня аблвыканкама Іван Крупко, памочнік Прэзідэнта Рэспублікі Беларусь – інспектар па Гомельскай вобласці Юрый Горлаў, старшыня абласнога Савета дэпутатаў Кацярына Зянкевіч, старшыня гарвыканкама Уладзімір Прывалаў.

– З вялікай радасцю прыняла запрашэнне папрысутнічаць на адкрыцці такога важнага для краіны сацыяльнага аб'екта. Таму што ў прыярытэце ў нашай дзяржавы – здароўе грамадзян, – падкрэсліла Наталля Качанава. – Упэўнена, што гэты сучасны басейн для паўмільённага горада стане знакавым, бо нашы людзі любяць спорт і ганарацца поспехамі землякоў на спаборніцтвах. Нашая нацыя павінна быць моцнай, а для гэтага патрэбныя такія аб'екты.

Старшыня Савета Рэспублікі падзякавала будаўнікам за якасную працу.

Басейн з'явіўся недалёка ад знесенага ў 2022 годзе «Дэльфіна», на звыклым для мясцовых жыхароў месцы. Унутры абсталяваны дзве чашы: вялікая 25 на 13,5 метра на пяць дарожак і малая 12,5 на 6,4 метра, трэнажорная зала, зала сухога плавання, навучальны клас з сучасным абсталяваннем, раздзявалкі, трэнерскія і іншыя неабходныя памяшканні.

– Ведаю, як доўга гамяльчане чакалі гэты басейн і як пільна сачылі за лёсам старога будынка. Сёння замест аднаго «Дэльфіна» гараджане атрымалі два спартыўныя аб'екты: басейн і шматфункцыянальную пляцоўку, – павіншаваў жыхароў абласнога цэнтра губернатар Іван Крупко.

Па выніках сацапытання плаванне – самы любімы від спорту сярод гамяльчан, адзначыў кіраўнік рэгіёну. Каб аб'ект быў якасным, да яго праектавання падключалі прафесійных спартсменаў.

– Аб'ект з'яўляецца сведчаннем паслядоўнай сацыяльнай палітыкі нашай дзяржавы. Няхай ён стане залогам крэпасці духу сучаснасці і будучых пакаленняў беларусаў, – пажадаў старшыня аблвыканкама.

Для фізічна аслабленых асоб прадугледжаны пад'ёмнікі, добраўпарадкаваны санітарныя і душавыя пакоі, нанесена тактыльная разметка і маркіроўка для людзей са слабым зрокам, памяшканні абсталяваны таблічкамі са шрыфтам Брайля.

Басейн перададуць ва ўпраўленне ДЮСШ № 6. Акрамя навучальнага працэсу спартсменаў аддзялення па плаванні і школьнікаў, займацца змогуць усе ахвочыя, а ў малой чашы ёсць магчымасць арганізаваць груднічковае плаванне.

Пераходнай галерэяй аб'ект злучаны з сярэдняй школай № 38. Асаблівую ўвагу надалі добраўпарадкаванню прылеглай тэрыторыі: тут з'явіўся невялікі сквер з тратуарамі, лаўкамі, кветнікамі.

Папярэдні будынак "Дэльфіна" быў пабудаваны ў 1969 годзе. У той час ён з'яўляўся адным з самых запатрабаваных у горадзе. Эксплуатаваўся да 2015-га, а ў 2022-м яго знеслі.