Сваім канстытуцыйным правам губернатар скарыстаўся на ўчастку для галасавання № 87 у Гомелі.

Гасцей тут сустракалі жывой музыкай, гандлёвымі кропкамі і выставай рамеснікаў. Моладзь з БРСМ вітала галасуючых і завязвала ім зялёна-чырвоныя стужкі як сімвал адзінства беларускага народа.

– Аддаў голас за нашу сучаснасць і будучыню. Выбары для мяне – надзейны мост ва ўпэўненае заўтра. Гэта планамерная работа, накіраваная на сацыяльна-эканамічнае развіццё краіны і асобных рэгіёнаў: рэалізацыя сур'ёзных інвестпраектаў, будаўніцтва дашкольных устаноў і школ, аб'ектаў аховы здароўя. Калі ўсё робіцца своечасова, людзі гэта бачаць, – падкрэсліў губернатар.

Вывучаючы біяграфію кандыдатаў, Іван Крупко звяртаў увагу на тое, каб прэтэндэнт быў прафесіяналам у сваёй справе, ацэньваў яго ўклад у развіццё прадпрыемства і грамадства:

– Людзі павінны бачыць, што ён будзе адстойваць інтарэсы рэгіёна і краіны. Думаю, кожны, хто прыйшоў на выбарчы ўчастак, зрабіў выбар на карысць сваёй малой радзімы і Беларусі, яе ўпэўненай сучаснасці і будучыні.

Старшыня аблвыканкама павіншаваў упершыню галасуючых з важнай для іх падзеяй. Навучэнец Гомельскага медкаледжа Павел Дзегцяроў расказаў, што яго сям'я прымае ўдзел у кожнай электаральнай кампаніі, ад канстытуцыйнага права не адмаўляюцца. Малады чалавек падзякаваў за цёплы прыём на ўчастку:

– Прыемна, што так сустрэлі, падарылі пазітыўныя эмоцыі. Для мяне гэта адказнасць і гонар. Першы выбар зрабіў на карысць сваёй краіны, каб яна была лепшай і прыгажэйшай. У біяграфіі кандыдатаў глядзеў на тое, каб чалавек быў сапраўдным патрыётам і адстойваў ідэі працвітання Беларусі.

Усяго на 87-м участку па спісе зарэгістраваны 2983 выбаршчыкі, з іх 33 упершыню галасуючыя. Крыху больш за 45% прагаласавалі датэрмінова.