На мерапрыемства запрасілі 17 шлюбных пар з розным стажам сямейнага жыцця. Усе яны мелі магчымасць выказацца, задаць пытанні.

Як адзначыла старшыня камітэта па працы, занятасці і сацыяльнай абароне аблвыканкама Надзея Цупа, у рэгіёне дзіцячую дапамогу атрымліваюць амаль 17 тысяч сямей, у вобласці адкрыта каля 22 тысяч дэпазітных рахункаў для сямейнага капіталу. Пры нараджэнні дзіцяці для бацькоў прадугледжаны водпуск да 14 дзён. У Працоўны кодэкс унесены і змяненні ў частцы дыстанцыйнай работы, што зараз вельмі актуальна. Яны даюць магчымасць маме ці тату быць разам з дзецьмі, працаваць выдалена і атрымліваць заработную плату.

Дэпутат Палаты прадстаўнікоў Нацыянальнага сходу Беларусі Вольга Крэч падкрэсліла, што наша краіна – адзіная ў свеце, дзе дэкрэтны водпуск, які аплачваецца, доўжыцца тры гады. Ёсць падтрымка для шматдзетных сем'яў, напрыклад прывілеі пры будаўніцтве жылля.

– Але, на жаль, нараджальнасць у Беларусі зніжаецца. Па статыстыцы, яшчэ прыкладна 70 гадоў таму ў кожнай сям'і выхоўвалася па 5–8 дзяцей. І гэта ў пасляваенны час, калі было мала грошай і ўсё разбурана. А што зараз беларускам перашкаджае нараджаць? – задаецца пытаннем Вольга Крэч. – Хочацца кожнаму пажадаць быць шчаслівым. І памятаць, што любоў да сваёй краіны пачынаецца з любві да сям'і, мамы і таты.

Старшыня камітэта ідэалагічнай работы і па справах моладзі Дзяніс Язерскі адзначыў, што сёння вельмі важна святкаваць Дзень маці і Дзень бацькі. А моцная сям'я – гэта аснова дзяржаўнай бяспекі.