Абласное ўпраўленне МНС адпрацоўвае навыкі рэсурснага забеспячэння пажарнага аварыйна-выратавальнага атрада ва ўмовах ваеннага часу. 

У трэніроўцы прымаюць удзел губернатар Іван Крупко і першы намеснік міністра па надзвычайных сітуацыях Аляксандр Худалееў, намеснік міністра па НС Ігар Болатаў, старшыні гаррайвыканкамаў, прадстаўнікі ваенкаматаў і іншых службаў.

Асноўныя мэты трэніроўкі – праверыць рэальнасць выканання спланаваных мерапрыемстваў па рэсурсным забеспячэнні органаў і падраздзяленняў па надзвычайных сітуацыях ва ўмовах ваеннага часу і набыць практычныя навыкі па забеспячэнні ўстойлівага функцыянавання арганізацый у асаблівых абставінах.

– У трыццаці кіламетрах ад нашай паўднёвай мяжы ідзе СВА, на заходніх рубяжах мілітарызацыя нарастае. І ніхто з краін НATА не кажа пра мір. Мы павінны быць гатовыя да ўсяго. Сёння мы праверым і тэарэтычную, і практычную гатоўнасць узаемадзеяння дадатковых сіл з сілавым блокам. Падобныя трэніроўкі па ўзгадненні з вобласцю трэба ў перспектыве правесці ў раёнах рэгіёна, – падкрэсліў ва ўступным слове старшыня аблвыканкама.

У выпадку непрадбачаных абставінаў сіламі абласнога ўпраўлення МНС будзе разгорнуты палатачны лагер у палявых умовах.

Удзельнікам трэніроўкі прадэманстравалі ўмовы работы такога лагера. Па перыметры ён абгароджаны плотам, на тэрыторыі знаходзіцца ўсё, што трэба ва ўмовах ваеннага часу.

Месцы размяшчэння і сховішчы асабістага састава, дэзінфекцыйна-душавая машына, пункты кіравання і харчавання – лагер адпавядае ўсім нормам і патрабаванням.

У палявым медыцынскім пункце могуць аказаць хуткую дапамогу, а перасоўчая аўтамабільная рамонтная майстэрня транспартных сродкаў дасць магчымасць забяспечыць тэхнічнае абслугоўванне транспарта ва ўмовах ад -40 да +50 градусаў па Цэльсіі.

Тэрыторыя абсталявана сістэмай назірання, што дазволіць забяспечыць дадатковую бяспеку лакацыі.

Падчас размовы з журналістамі Іван Крупко падкрэсліў, што Рэспубліка Беларусь не збіраецца ні на каго нападаць. Але мы гатовы абараняць межы Радзімы:

– На працягу двух дзён сумесна з МНС адпрацавалі практычныя навыкі на выпадак ваеннага становішча. Усё гэта дапаможа забяспечыць суверэнітэт і незалежнасць краіны, быць адзінымі ў гэтай рабоце. Мы сваю краіну не ад-дадзім нікому.

– За гэтыя дні мы адпрацавалі шэраг элементаў, якія датычацца ўсіх грамадзянскіх фарміраванняў Гомельшчыны ў перыяд дзеяння ваеннага часу. У тым ліку праверана гатоўнасць спецыяльных фарміраванняў, іх укамплектаванасць. Сістэма Гомельскай вобласці гатова да пераводу на ваенны час, – адзначыў першы намеснік міністра па надзвычайных сітуацыях Аляксандр Худалееў.

Першы намеснік міністра падкрэсліў, што выпрацаваны кіраўнічыя рашэнні, якія дазволяць распрацаваць нарматыўна-прававыя акты для пераводу асабістага складу на ваенныя рэйкі:

– Вельмі прыемна, што кіраўніцтва вобласці пагружана ў тэматыку. Я думаю, гэта дасць свой плён і вынікі.