З пытаннямі да губернатара звярнуліся два чалавекі.

Максім Мікалаевіч з аграгарадка Крупец Добрушскага раёна просіць адрамантаваць дарогу па вуліцы Набярэжнай у сваім населеным пункце:

– Калі праходзяць моцныя дажджы і бездарожжа, складана праехаць. Хуткая дапамога спыняецца на краі вуліцы, урачы ідуць пешшу.

Як высветлілася падчас прыёму, па суседстве працуе цяжкая тэхніка, машыны зносяць старыя пустуючыя дамы. Засталося разабраць тры домаўладанні, пасля гэтага пакрыццё прывядуць у належны стан.

– Да 18 лістапада ўсе пустуючыя будынкі павінны знесці, а дарогу трэба аднавіць. Пакласці пясок, гравій, прагрэйдзіраваць. Акрамя таго, перадаць дарогу ад сельгаспрадпрыемства на баланс ЖКГ, каб абслугоўвалася, як належыць, камунальнымі службамі, – даў даручэнне старшыні Добрушскага райвыканкама губернатар.

Акрамя таго, жыхар аграгарадка падняў пытанне аб дрэннай якасці вады ў сваім доме, яна іржавая. Крыніца – воданапорная вежа, якая належыць гаспадарцы. Вырашаць пытанне трэба комплексна, упэўнены старшыня аблвыканкама. Пасля разгляду некалькіх варыянтаў плана далейшых дзеянняў заявіцелю дадуць падрабязны адказ.

Гамяльчанка Таццяна Пятроўна хоча вярнуць зямельны ўчастак у аб-ластным цэнтры, які ў 1994 годзе ёй выдзелілі для будаўніцтва жылога дома. Як патлумачылі землеўпарадчыкі, за гэты час акт аб дзяржрэгістрацыі не быў аформлены належным чынам. У 2018 годзе суседзі звярнуліся ў гарвыканкам з просьбай навесці парадак на ўчастку, уладальніка кампетэнтныя органы не выявілі. Было прынята рашэнне аб продажы зямлі з аўкцыёну. У 2023 годзе яна прададзена. З гэтага моманту былая ўладальніца і стала адстойваць свае правы.

– Паўнамоцтваў забраць участак у новых уладальнікаў ні ў гарвыканкама, ні ў аблвыканкама няма. Вы маеце права звяртацца ў суд, – падсуміраваў губернатар.