Мітынг каля Вечнага агню ў абласным цэнтры сабраў прадстаўнікоў улады, грамадскіх арганізацый, ветэранаў, калектывы прадпрыемстваў, моладзь.

– Віншую ўсіх, для каго абараняць Радзіму – прафесія, патрыётаў, гатовых пры самай малой небяспецы ўстаць на абарону краіны. Сёння, як ніколі раней, кожны з нас усведамляе, што мы можам страціць, – са словамі падзякі да абаронцаў звярнуўся старшыня аблвыканкама Іван Крупко.

Губернатар падкрэсліў, што міф пра казачную Еўропу рухнуў, а па-сапраўднаму казачная краіна – гэта наша маленькая ўтульная Беларусь, дзе чыстыя вуліцы і намеры, чыстая вада і неба, дзе выконваюцца жаданні.

– Кожны паасобку і ўсе разам, як маці засланяе ў небяспечныя хвіліны свайго дзіцяці, мы гатовы абараніць сваю любімую Беларусь, – не сумняваецца кіраўнік рэгіёна. – Узброеныя Сілы Беларусі верныя слаўным ваенным традыцыям і бездакорна выконваюць канстытуцыйны абавязак па абароне інтарэсаў народа і беларускай дзяржавы.

Памяць тых, дзякуючы каму мы жывём, ушанавалі хвілінай маўчання. Падрастаючае пакаленне гатова выканаць свой воінскі абавязак і абараніць дом, сям'ю, Радзіму, ад імя моладзі запэўніў удзельнікаў мітынгу курсант ваенна-транспартнага факультэта БелДУТ Уладзіслаў Лаўрэнцьеў:

– Мы ганарымся беларускім войскам, яно забяспечвае стабільнасць нашай краіны. Мы не прымаем палітыку дзяржаў, якая праводзіцца супраць беларускага народа. Паспрабуем быць дастойнымі ратных подзвігаў тых, хто абараняў суверэнітэт Беларусі.