Сіла – у адзінстве продкаў і нашчадкаў: урачысты сход да Дня Незалежнасці ў Гомелі аб'яднаў жыхароў рэгіёна розных пакаленняў

З Днём Незалежнасці прысутных павіншаваў старшыня аблвыканкама Іван Крупко:

– Гэтае свята непарыўна звязана з адной з самых важных падзей у нашай гісторыі – вызваленнем Беларусі ад нямецка-фашысцкіх захопнікаў. Яно заваявана жыццём кожнага трэцяга беларуса. І кожны дзень, кожную гадзіну нашага шчаслівага мірнага жыцця мы напаўняем працоўнымі і інтэлектуальнымі дасягненнямі, творчымі поспехамі, спартыўнымі рэкордамі, каб прысвяціць многія з іх памяці герояў-вызваліцеляў, загінуўшых за свабоду і незалежнасць нашай роднай Беларусі.

Губернатар падкрэсліў, што Дзень Рэспублікі Гомельшчына сустракае стабільна працуючым і квітнеючым рэгіёнам, а стабільная работа прадпрыемстваў і кожнага жыхара забяспечвае канкурэнтаздольнасць вобласці на міжнароднай арэне.

Гомельская вобласць планамерна развіваецца, рэалізуюцца ініцыятывы па фарміраванні здаровага ладу жыцця і патрыятычным выхаванні. На гэтым зрабіў акцэнт Іван Крупко:

– Моцная краіна – базавая ўмова яе далейшага развіцця. А развіццё немагчыма без захавання гістарычнай праўды. Скажэнне вынікаў вайны, знішчэнне помнікаў савецкім воінам-вызваліцелям – прамая пагроза будучыні. Таму вялікая перамога мае патрэбу ў нашай абароне.

Беларусь – адна з нямногіх краін, якія прайшлі цяжкі, цярністы шлях станаўлення і росквіту. Краіна, якая здолела стаць навукаёмістай, высокатэхналагічнай дзяржавай, падкрэсліў кіраўнік рэгіёна:

– Тое, што сёння мы маем у эканоміцы, у сацыяльнай сферы, – вынік таго, што ўсе гэтыя гады мы ішлі сваім шляхам і жылі сваім розумам. І наша мэта – забяспечыць далейшы эканамічны рост узроўню дабрабыту нашых людзей. Мы, як і ўсе разумныя людзі, хочам міру і стабільнасці на планеце. Астатняе створым самі.

Святочны канцэрт «Гэта мая краіна!» падарылі гасцям творчыя калектывы Гомельшчыны. Спляценне традыцый і сучаснасці, музыкі, танца і гімнастычнага мастацтва – артысты чарговы раз даказалі, што Беларусі ёсць чым ганарыцца.