VII Усебеларускі народны сход пачынае свой шлях у год вызвалення Беларусі ад нямецка-фашысцкіх захопнікаў. У гэтым закладзены глыбокі сэнс пераемнасці пакаленній – вызваліцеляў і мірных стваральнікаў.

Ва ўрачыстай абстаноўцы нагрудны знак дэлегатам Гомельшчыны, якім жыхары рэгіёна даручылі прадстаўляць інтарэсы нашых людзей на Усебеларускім народным сходзе, уручылі ў абласной філармоніі старшыня аблвыканкама Іван Крупко, памочнік Прэзідэнта – інспектар па Гомельскай вобласці Юрый Горлаў, старшыня абласнога Савета дэпутатаў Кацярына Зянкевіч.

– Кожны з вас унёс свой уклад у развіццё малой радзімы. Кожны валодае не толькі неабходнымі ведамі, але і багатым практычным і жыццёвым вопытам для выканання ўскладзеных задач. І ўсе вы без выключэння патрыёты Беларусі, – падкрэсліў губернатар.

Кіраўнік рэгіёна адзначыў, што менавіта ад асабістага ўдзелу дэлегатаў, усведамлення адказнасці за прынятыя рашэнні і аб'ектыўнасці залежыць тое, якой будзе наша краіна, якім стане "заўтра" ўсяго беларускага народа.

– Упершыню буду прысутнічаць на ВНС. Удзельнічаць не толькі вялікі гонар, але і вялікая адказнасць. Пра тое, што сход сапраўды ўсенародны, гаворыць яго склад: дэпутаты, моладзь, ветэраны, прадстаўнікі грамадзянскай супольнасці, партый. Задачы будуць вырашацца стратэгічныя для нашай краіны – ад працы эканомікі да ваеннай бяспекі. Канстытуцыяй УНС прадастаўлены найшырэйшыя паўнамоцтвы. Упэўнена, што прынятыя рашэнні, будуць накіраваны на карысць нашай роднай Беларусі, – не сумняваецца дэпутат Палаты прадстаўнікоў Нацыянальнага сходу Рэспублікі Беларусь Анжаліна Сырамятнікава.