Ад новай школы да рэабілітацыйнага цэнтра

Нараду з сацыяльным блокам правёў старшыня аблвыканкама Іван Крупко з удзелам памочніка Прэзідэнта – інспектара па Гомельскай вобласці Юрыя Гор-лава.

Бяспека дзяцей і ўтульнасць педагогаў

Нягледзячы на тое, што колькасць навучэнцаў за апошнія тры гады павялічылася на 2025 чалавек, ва ўстановах дашкольнай адукацыі назіраецца зніжэнне колькасці дзяцей, гэта сведчыць аб дэмаграфічнай яме, з якой у будучыні сутыкнуцца і школы. У раёнах, дзе колькасць дзяцей расце, адкрыты новыя ўстановы адукацыі: дзіцячы сад у Мазыры, корпус дашкольнай установы ў Гомельскім раёне. У студзені гэтага года адкрылі новы будынак Камунараўскай сярэдняй школы ў Буда-Кашалёўскім раёне. У планах на 2024-ы – дзіцячы сад у Гомелі, рамонт памяшканняў былога аздараўленчага лагера для пачатковай школы ў Чонках. Выдзеляць сродкі на капітальны рамонт ва ўстановах адукацыі Рамановічаў, Рэчыцы, Мазыра, Калінкавічаў, Гомеля.

Амаль 26 тысяч педагагічных работнікаў забяспечваюць адукацыйны працэс. Замацоўванасць спецыялістаў каля 85 працэнтаў, ніжэй за сярэдняга ў 2023-м спрацавалі ў сямі раёнах вобласці. Задача на гэты год – замацоўванасць не ніжэй за 90%, заданне па мэтавых напрамках павялічана больш чым на 30 месцаў.

Выніковасць адукацыйнага працэсу гаворыць сама за сябе: Гомельшчына займае лідзіруючыя пазіцыі па алімпіядным руху ў краіне. Усе ўстановы адукацыі абсталяваны трывожнымі кнопкамі, абнаўляецца аўтапарк, ён уключае больш за 260 адзінак. У мінулым годзе для падвозу навучэнцаў закупілі сорак аўтобусаў, сёлета набудуць дзесяць. Плюс падставіць плячо Мінадукацыі.

Іван Крупко паставіў задачу: унесці прапановы па арэндным жыллі для настаўнікаў. Да педагогаў, якія працуюць на месцах, ставіцца па-чалавечы, іх нельга нікім замяніць.

Значок ГПА ўсім жадаючым

Спортам і фізічнай культурай займаецца кожны чацвёрты жыхар вобласці. За мінулы год значкі ГПА атрымалі 1495 чалавек, плануецца, што ў 2024-м нормы здадуць не менш за 1300.

Забяспечаны ўмовы як для спорту высокіх дасягненняў, так і для масавых заняткаў, атлетаў з абмежаваннямі па здароўі. Ахоп навучэнцаў падрыхтоўкай у спартыўных установах адпавядае рэспубліканскім паказчыкам.

– Асноўная задача спартыўнай галіны сёння – кантроль будаўніцтва новых аб'ектаў, іх насычэнне, распрацоўка планаў загружанасці, – рэзюмаваў кіраўнік рэгіёну.

Новыя вакансіі пад патрэбы

На рынку працы ў 2024 годзе забяспечана выкананне ўсіх мэтавых паказчыкаў. Амаль 25 тысяч чалавек працаўладкаваны, 500 беспрацоўных прайшлі навучанне. Пад патрэбнасці прадпрыемстваў адкрываюцца новыя спецыяльнасці. Паколькі больш за 60% вакансій – працоўныя прафесіі, у першую чаргу суіскальнікаў прапануюць атрымаць спецыяльнасць вадзіцеля, будаўніка, даяркі.

Напружаная сітуацыя на рынку працы ў Ельскім, Нараўлянскім, Рэчыцкім, Хойніцкім раёнах. На кожнай тэрыторыі распрацаваны план з улікам магчымасцей, кантраляваць выкананне паказчыкаў будуць па кварталах. Назіраецца зніжэнне траўміраваных на вытворчасці. Нулявы траўматызм зафіксаваны ў 2023 годзе ў Брагінскім раёне.

На прыкладзе Добрушскага ТЦСАН разгледзелі, як больш актыўна займаць інвалідаў пасля 18 гадоў і пенсіянераў. У райцэнтры гэтая праца актыўна развіваецца, хапае ўсяго: ад матэрыяльна-тэхнічнай базы да кваліфікаваных работнікаў. Падобную практыку плануюць распаўсюдзіць ва ўсіх раёнах. У Гомелі прапануюць стварыць адзіны гарадскі цэнтр сацыяльнага абслугоўвання насельніцтва з арганізацыяй абласной метадычнай пляцоўкі па рабоце з інвалідамі.

Акультурыць аграгарадкі і вёскі

Колькасць наведванняў арганізацый культуры на 1000 чалавек насельніцтва – асноўны паказчык, па якім ацэньваюць працу галіны. Яго летась перавыканалі, сёлета дасягненне таксама магчыма. Зарплата работнікаў культуры працягне планава расці, у вобласці прадугледжаны надбаўкі. Паказчыкі па кінаабслугоўванні насельніцтва выкананы, у тым ліку ў аграгарадках. У малых населеных пунктах ёсць бібліятэкі і клубы, жыхары не адчуваюць культурнага голаду.

Завершаны рамонт у Юравіцкім манастыры, у Азарычах пасля рэканструкцыі адкрыты музейны комплекс, на 33 аб'ектах праводзіліся бягучыя работы. У 2024 годзе пачнецца мадэрнізацыя мемарыяла ў Чырвоным Беразе, чакаюць рамонту дзіцячыя школы мастацтваў у раёнах. Абмеркавалі магчымасць рэканструкцыі ДК "Фестывальны" ў Гомелі. Губернатар даручыў рацыянальна і адказна падысці да перадпраектных і праектных работ, прапрацаваць і прадумаць развіццё аб'ектаў.

Доступная медыцына і новае абсталяванне

У 2023 годзе ахоп насельніцтва рэгіёна дыспансерызацыяй забяспечаны на 93,7% пры плане ў 90%, колькасць практыкуючых урачоў на дзесяць тысяч насельніцтва складае 44,1. Асноўныя паказчыкі выкананы. 

Па статыстыцы, у сярэднім за год адзін чалавек звяртаўся больш за 12 разоў па медыцынскую дапамогу. 

У бягучым годзе плануецца адкрыць міжраённы цэнтр кардыялогіі на базе Жлобінскай ЦРБ, мадэрнізаваць Мазырскую гарадскую бальніцу. У абласной клінічнай бальніцы з'явіцца памяшканне пад МРТ і КТ з сучасным абсталяваннем. Абласны кардыяцэнтр абзавёўся кабінетам пад МРТ і ангіяграфічным кабінетам, апараты будзе набываць Міністэрства аховы здароўя. Яшчэ ў некалькіх раёнах правядуць рамонт медустаноў.

Кіраўнік рэгіёна настойвае, што праекты павінны распрацоўвацца хутчэй, каб будаўнікі змаглі пачаць работу ў цёплую пару года.