На працягу гадзіны да губернатара датэлефанаваліся шэсць чалавек. 

Гамяльчанка Святлана Аляксандраўна расказала, што ў яе доме па вуліцы Цімафеенкі слаба грэюць батарэі. Пасля ліквідацыі парыву на цеплатрасе ў кватэры стала цяплей, аднак праз некалькі дзён тэмпература зноў знізілася.

– Накіруем да вас спецыялістаў для правядзення замераў тэмпературы ў кватэры. Акрамя таго, правераць цэласнасць цеплатрасы, пры неабходнасці ліквідуюць непаладкі, – запэўніў губернатар. 

Алег Уладзіміравіч жыве ў прыватным сектары Гомеля, дом знаходзіцца ў тупіку. Ужо доўгі час у каліткі жыхары суседніх шматкватэрных дамоў выгульваюць сабак, у тым ліку вялікіх. Непадалёку ёсць спецыяльная пляцоўка для прагулак з гадаванцамі. Аднак асабістыя просьбы і спецыяльныя таблічкі не дапамагаюць. Пытанне прапрацуюць, пры неабходнасці на месцы ўсталююць відэакамеру, адказаў Іван Крупко. 

Пенсіянер Ігар Уладзіміравіч з Гомеля папрасіў звярнуць увагу на падземны пераход на праспекце Касманаўтаў: усталяваць навес ад дажджу і снегу над прыступкамі, правесці добраўпарадкаванне ўнутры. У бліжэйшы час на месцы правядуць абследаванне. 

Са Жлобінскага раёна датэлефанавалася Людміла Канстанцінаўна. У яе доме ў вёсцы Новыя Лукі ў выніку ўрагану пацярпеў дах. Па заяўцы ў райвыканкам з рамонтам не дапамаглі. 

– Уласнымі сіламі муж накрыць дом не можа, мы ўжо набылі патрэбныя матэрыялы. Патрэбна толькі вышка, – апісала сітуацыю вясковая жыхарка. 

Старшыня аблвыканкама паабяцаў у бліжэйшы час накіраваць у дом патрэбных спецыялістаў. 

Прагучалі таксама пытанні аб паляпшэнні жыллёвых умоў для маладой сям'і, аказанні медыцынскай дапамогі інваліду.