На працягу гадзіны да старшыні аблвыканкама датэлефанаваліся восем чалавек. Пытанні тычыліся легалізацыі самавольна занятага ўчастка, зямельных спрэчак, рамонту дарог.

Гамяльчанка Тамара Канстанцінаўна жыве ў доме па вуліцы Багданава, 10б, абласнога цэнтра, яна просіць адрамантаваць дарогу да суседняй паліклінікі, паколькі праехаць па ёй цяжка з-за ям і выбоін. Спецыялісты правядуць абследаванне і вырашаць, якія меры трэба прыняць, адказаў кіраўнік рэгіёна. Дарогу папрасіла зрабіць і Тамара Міхайлаўна з вуліцы Інтэрнацыянальнай у Гомелі. Акрамя таго, жыхарка абласнога цэнтра расказала, што ў яе двары патрабуецца знесці аварыйныя дрэвы. Пытанні застаюцца на кантролі.

Максім Сяргеевіч з Рэчыцы не можа легалізаваць самавольна заняты ўчастак, які быў выдзелены для разваротнай пляцоўкі ля будаўнічай крамы. Працы прадпрымальнік выканаў, але зарэгістраваць і ўвесці аб'ект у эксплуатацыю не паспеў. Старшыня аблвыканкама запэўніў, што ў бліжэйшы час на месца выедуць прадстаўнікі райвыканкама і разбяруцца, што трэба для легалізацыі зямельнага ўчастка.

З лістапада ў жыхароў верхніх паверхаў дома па вуліцы Шасэйнай абласнога цэнтра няма напору гарачай вады, расказаў гамяльчанін Аляксандр Аляксеевіч. Іван Крупко даручыць разабрацца ў сітуацыі камунальным службам. Пакуль пытанне не вырашыцца, яно застанецца на кантролі губернатара.

Датэлефанавалася да кіраўніка рэгіёна і Ганна Іванаўна з вуліцы Крылова ў Гомелі. Яна наракае, што невялікі магазін, які знаходзіўся побач з яе домам, зачыніўся, пры гэтым не было ні аб'явы, ні папярэджання. Старшыня аблвыканкам пасля вывучэння пытання дасць разгорнуты адказ аб тэрмінах адкрыцця гандлёвай кропкі пасля рамонту.

Пенсіянер з Рэчыцы расказаў, што ў лазні па вуліцы Жыляка райцэнтра са студзеня не працуе буфет. Па словах уладальнікаў, кропка грамадскага харчавання з'яўляецца стратнай. Эканамічную эфектыўнасць аб'екта вывучаць і прапрацуюць пытанне больш дэталёва.