Народнае ўскладанне, прысвечанае 82-й гадавіне Хатынскай трагедыі, з удзелам кіраўніцтва Гомельскай вобласці прайшло на мемарыяльным комплексе «Ала». 

Старшыня аблвыканкама Іван Крупко і яго намеснікі, памочнік Прэзідэнта – інспектар па Гомельскай вобласці Руслан Пархамовіч, член Савета Рэспублікі, старшыня абласнога Савета дэпутатаў Кацярына Зянкевіч ушанавалі памяць загінуўшых у гады Вялікай Айчыннай вайны хвілінай маўчання і ўсклалі кветкі да памятнага знака.

Раніцай 14 студзеня 1944 года Алу акружыў карны атрад нямецка-фашысцкіх захопнікаў і ўчыніў жорсткую расправу над мясцовымі жыхарамі і тымі, хто спадзяваўся схавацца ў аддаленай вёсцы ў асяроддзі балот і густых лясоў. Тут загінулі амаль 1800 чалавек, з іх 950 – дзеці. Гэта як дванаццаць Хатыняў. Мемарыял у Светлагорскім раёне называюць месцам, дзе плачуць камяні.

З 1452 населеных пунктаў, спаленых на акупаваных землях Гомельскай вобласці ў гады Вялікай Айчыннай вайны, 51 вёска не адрадзілася, таму што была знішчана разам з усімі жыхарамі ад малога да вялікага.

– Месцы, падобныя Але, пакідаюць змешаныя ўражанні, гэта душэўнае абурэнне і пытанні "За што?", "Чаму?». Мне здаецца, што кожны грамадзянін павінен пабываць у такіх месцах, адчуць усім сэрцам тое гора і пакуты, якія, на жаль, давялося выпрабаваць нашым продкам, – падкрэсліў падчас размовы з журналістамі Руслан Пархамовіч.

Памочнік Прэзідэнта падкрэсліў, што гэтую памяць трэба захаваць для будучых пакаленняў:

Нездарма кажуць, што калі мы забываем сваё мінулае, то не будзем мець ніякай будучыні. Менавіта таму палітыка нашай дзяржавы выбудоўваецца такім чынам, каб мы памяталі, дзеля чаго мы змагаемся, развіваем сваю краіну і што мы робім, каб надалей не дапускаць такога на нашай зямлі. Гэта безумоўна важна.