Галоўнай тэмай сустрэчы стала стратэгія паспяховага развіцця Беларусі. Акцэнт зрабілі на захаванні якасці прадукцыі, што вырабляецца беларускімі прадпрыемствамі. 

– Якасная праца кожнага на сваім рабочым месцы – тое, на што настройвае нас Прэзідэнт Аляксандр Лукашэнка. Задача прадпрыемстваў Гомельшчыны – заставацца канкурэнтаздольнымі. Для гэтага неабходна ўжываць сучасныя сусветныя тэхналогіі, а таксама з меншымі затратамі вырабляць высокаякасную прадукцыю, – падкрэсліў губернатар. 

Разгледзелі таксама вынікі завяршальнай пяцігодкі. Падтрымка сем'яў з дзецьмі і таленавітай моладзі, захаванне ўзроўню заробкаў і пенсій, зніжэнне беспрацоўя, паляпшэнне ўмоў для забеспячэння высокакваліфікаванай медыцынскай дапамогі, мадэрнізацыя аб'ектаў сацсферы – за апошнюю пяцігодку гэтым пытанням на Гомельшчыне надалі асаблівую ўвагу.

ААТ «Калінкавічыхлебапрадукт» спецыялізуецца на выпуску пшанічнай і жытняй мукі, камбікорму. За 2024 год тут выраблена 3,8 тысячы тон мукі, 118,4 тысячы тон камбікармоў. Выкананы ўсе ключавыя паказчыкі, у 2025-м плануюць павялічыць аб'ёмы. На прадпрыемстве працуюць 250 чалавек. Прадстаўнікі калектыву змаглі задаць свае пытанні кіраўніку рэгіёна. 

Цікавіліся работнікі планамі на Год добраўпарадкавання, рэканструкцыяй дарогі ад Рэчыцы да Калінкавічаў, буйнымі праектамі на бліжэйшы час. У наступным годзе ў Калінкавічах плануюць праводзіць абласныя дажынкі, за што мясцовыя жыхары падзякавалі Івану Крупко. 

– Мы падышлі да гэтага загадзя. Будзе распрацаваны план добраўпарадкавання і рэканструкцыі аб'ектаў, рамонту дарог. Нешта пачнем у гэтым годзе. Калінкавічы знаходзяцца ў цэнтры вобласці, праз райцэнтр праходзяць многія аўтамабільныя дарогі і чыгунка. Таму было прынята рашэнне правесці тут свята працаўнікоў вёскі. Пры правядзенні работ выслухаем і меркаванне грамадзян, – падзяліўся планамі губернатар. 

Задалі пытанне і пра рэканструкцыю мемарыялаў у 2025 годзе. Іван Крупко расказаў, што ў планах мадэрнізацыя комплексу «Баграціён» і яшчэ аднаго памятнага месца на землях спаленай вёскі Першамайск (раней Кабылёва) у Рэчыцкім раёне. Старшыні аблвыканкама таксама падзякавалі за адкрыццё сучаснага цэнтра творчасці дзяцей і моладзі.