Педагогам, якія дабіліся высокіх вынікаў на рэспубліканскіх конкурсах прафесійнага майстэрства, старшыня аблвыканкама Іван Крупко ўручыў сёння ўзнагароды за ўвагу да кожнага дзіцяці.

Ганаровыя граматы атрымалі Сяргей Шамінскі і Любоў Палын.

Упершыню ў гісторыі конкурсу лепшым настаўнікам Беларусі другі раз запар названы педагог з Гомельскай вобласці. У 2023-м званне атрымаў Сяргей Шамінскі, настаўнік выяўленчага мастацтва Доўскай СШ Рагачоўскага раёна.

– Педагагічнае жыццё Сяргея Міхайлавіча – больш за 30 гадоў работы ў школе роднага аграгарадка. І ўвесь гэты шлях працяты бязмежнай павагай і любоўю да дзяцей, Радзімы, азораны мастацтвам і творчасцю, – падкрэсліў кіраўнік рэгіёна.

Сярод педагогаў дашкольнай адукацыі ў конкурсе "Педагагічны дэбют" лепшай у рэспубліцы стала Любоў Палын, выхавацель дзіцячага сада № 40 Мазыра.

Ярка заявіла пра сябе на ўзроўні рэспублікі і моладзь. Фіналістаў і прызёраў конкурсаў адзначылі падзякай Гомельскага аблвыканкама. Гэта загадчык Літвінавіцкага дзіцячага сада Кармянскага раёна Лілія Грышчанка, выхавацель дзіцячага сада № 30 Мазыра Домна Кібіткіна, дырэктар Хракавіцкай сярэдняй школы Брагінскага раёна Андрэй Смалянчук, настаўнік рускай мовы і літаратуры сярэдняй школы № 9 Мазыра Віктар Гарбачук, настаўнік інфарматыкі сярэдняй школы № 7 Калінкавічаў Вольга Афанасьева, настаўнік геаграфіі гімназіі Светлагорска Наталля Нікіценка, настаўнік пачатковых класаў сярэдняй школы № 5 Рагачова Іна Беразюк, настаўнік англійскай мовы сярэдняй школы № 2 Акцябрскага Надзея Гардзіенка, настаўнік беларускай мовы і літаратуры сярэдняй школы № 16 Мазыра Яўгеній Есіс, настаўнік хіміі сярэдняй школы № 4 Рагачова Таццяна Лашакова.