Звярталіся з просьбамі вырашыць сямейныя спрэчкі, камунальныя пытанні, забяспечыць медыцынскае абслугоўванне.

За гадзіну прамой лініі да губернатара датэлефанаваліся шэсць жыхароў вобласці. 

Андрэй Аляксандравіч з Буда-Кашалёва падзяліўся, што гарачая вада ў яго доме не награваецца да патрэбнай тэмпературы. Звяртаўся ў мясцовыя органы ўлады, аднак сітуацыя не змянілася. Іван Крупко адказаў, што пытанне застанецца на яго асабістым кантролі да поўнага вырашэння.

Святлана Яўгенаўна з Лельчыцкага раёна працавала прыбіральшчыцай у гаспадарцы, аднак з-за непаразумення з кіраўніцтвам вымушана была звольніцца. Цяпер не можа працаўладкавацца. У бліжэйшы час ёй прапануюць некалькі вакансій, адзначыў губернатар.

На асабістым прыёме жыхары пасёлка Чырвоны Сцяг Буда-Кашалёўскага раёна расказалі, што ў жніўні ў іх шматкватэрным доме пачаўся капітальны рамонт. Аднак працы праводзяцца павольна. Жыхары турбуюцца, што дом не будзе гатовы да халадоў.

На прыёме грамадзян прысутнічалі праекціроўшчыкі, падрадчыкі па аб'екце, прадстаўнікі камунальных службаў. Кіраўнік рэгіёна паставіў адказным выразны тэрмін – капітальны рамонт павінен быць завершаны да канца кастрычніка:

«Неабходна распісаць парадак работ на найбліжэйшы месяц. Працы праводзіць штодня без збояў і затрымак».

Заяўнікі таксама звярнулі ўвагу на неабходнасць уцяплення фасада. Пытанне вывучаць дадаткова пасля абследавання.