У круглым стале прынялі ўдзел прадстаўнікі сферы адукацыі, маладыя спецыялісты з усёй Гомельшчыны, а таксама выпускнікі трох педагагічных каледжаў.

Мерапрыемства праводзілася ў рамках пагаднення паміж галоўным упраўленнем адукацыі аблвыканкама і абласной арганізацыі Беларускага прафесійнага саюза работнікаў адукацыі і навукі на 2022–2025 гады.

– Кожны год вялікая сям'я педагогаў рэгіёну прырастае новымі асобамі – да тысячы чалавек прыходзяць у сферу ў якасці маладых спецыялістаў. Нам вельмі важна чуць ваша меркаванне, каб разумець, куды далей рухацца і што яшчэ паляпшаць, – падкрэсліў начальнік галоўнага ўпраўлення адукацыі аблвыканкама Руслан Смірноў.

Старшыня абласной арганізацыі Беларускага прафесійнага саюза работнікаў адукацыі і навукі Жанна Ждановіч дадала, што маладым спецыялістам удзяляецца шмат увагі. Іх камфорт, дастойная аплата працы, паважлівыя адносіны калег важныя, паколькі дапамагаюць замацавацца ў прафесіі і імкнуцца да ганаровага звання заслужанага настаўніка.

Моладзі расказалі аб сацыяльных гарантыях, прававой абароне і фінансавай падтрымцы. Абмеркавалі праблемныя пытанні адаптацыі ў калектывах і прафесійнага станаўлення, жыллёвыя і бытавыя ўмовы. Падрабязна разгледзелі, як адбываецца разлік заробку і якія надбаўкі належаць тым, хто робіць першыя крокі ў прафесіі.

Сямі найлепшым моладзевым прафсаюзным актывістам уручылі грашовыя сертыфікаты на аднаразовую выплату галіновага прафсаюза.

Пасля мерапрыемства маладыя людзі Гомельшчыны ўсклалі кветкі да мемарыяла героям-апалчэнцам па вуліцы Баўмана і ўшанавалі памяць герояў хвілінай маўчання.