Сустрэчу з будаўнікамі прымеркавалі да 85-годдзя ўз'яднання Заходняй Беларусі і БССР.

У сваім выступленні Юрый Горлаў зрабіў акцэнт на гістарычнай значнасці Дня народнага адзінства і яго ролі ў сучаснай Беларусі. Для беларусаў гэта вялікае свята, таму што цэласнасць нашай краіны сімвалізуе яе далейшае развіццё і міралюбівую палітыку, якая праводзіцца ў Беларусі. Пасля далучэння заходніх земляў да БССР справядлівасць перамагла, зараз наша краіна знаходзіцца ў сваіх гістарычных межах. Самае галоўнае – шанаваць гэта і не забываць, старацца не толькі захаваць усё, але і прымножыць.

– Мы павінны вынесці правільныя ўрокі з гісторыі, а наша адзінства з кожным годам павінна мацнець. Разам нам любая задача пад сілу, – адзначыў памочнік Прэзідэнта.

Юрый Горлаў азнаёміўся з вытворчасцю. Ён падкрэсліў, што будаўнічы комплекс заўсёды быў прыярытэтным у краіне, а Гомельскі ДБК забяспечаны ўсім неабходным, каб працаваць рэнтабельна, выконваючы даведзеныя аб'ёмы. 

У ходзе прыёму грамадзян, які прайшоў у гарадскім выканаўчым камітэце, да памочніка Прэзідэнта – інспектара па Гомельскай вобласці звярнуліся восем чалавек. 

Пры правядзенні капітальнага рамонту дома па вуліцы Катуніна, дзе пражывае Валянціна Дзям'янаўна, не выкананы работы па ўцяпленні даху, што, паводле яе слоў, прыводзіць да прамярзання памяшкання ў халодны час. У летні час у кватэры стаіць невыносная спякота. Выкарыстоўваць кандыцыянер пенсіянерцы проціпаказана па стане здароўя. Таксама яна наракала на аўтапаркоўку каля дома, арганізацыя якой прывяла да выдалення дрэў. Для вырашэння першага пытання Юрый Горлаў даручыў правесці дадатковую экспертызу, каб устанавіць, ці ёсць цепластраты. Што да другога пытання, праект стаянкі ўзгоднены на ўсіх узроўнях, дрэвы ўжо ніхто не верне.

Памочнік Прэзідэнта прапанаваў адпаведным службам пры праектаванні ў будучым парковачных месц разгледзець магчымасць арганізацыі зялёных астраўкоў, на якіх высадзяць дрэвы. 

Вырашыць зямельную спрэчку папрасіла гамяльчанка Таццяна Пятроўна. Яшчэ ў пачатку 90-х ёй выдзелілі ўчастак пад будову жылога дома. У сувязі з тым, што заяўніца не выканала свае абавязацельствы забудоўшчыка, а менавіта – не ўзвяла будынак на працягу трох гадоў і не аформіла яго ва ўласнасць, участак выставілі на аўкцыён і прадалі іншым людзям. Увесь гэты час Таццяна Пятроўна выплачвала падатак за карыстанне зямлёй, таму звярнулася ў суд для атрымання кампенсацыі. Яна мяркуе, што для адабрання ўчастка не было падстаў, а работнікам землеўпарадкавальнай службы, які выступае ў судзе сведкам па справе, дапушчана службовая халатнасць.

– Суд ва ўсім разбярэцца. Бо вы самі туды звярнуліся, не бачу сэнсу падключаць пракуратуру. Вашу просьбу па замене прадстаўніка земслужбы мы задаволім, – рэзюмаваў Юрый Горлаў.

На прыёме разгледжаны таксама пытанні працаўладкавання, аховы здароўя, транспартных зносін, падаткаабкладання, афармлення ўласнасці. Па некаторых прыняты рашэнні непасрэдна ў ходзе прыёму, частка пытанняў узята на кантроль.