Першым прыйшоў былы галоўны ўрач Чачэрскага раённага цэнтра гігіены і эпідэміялогіі. Спецыяліст не згодны з рашэннем не прадаўжаць кантракт і са зместам дакладной запіскі на яго імя, адпраўленай у Міністэрства аховы здароўя.

– Я адпрацаваў на гэтай пасадзе больш за 20 гадоў, з нараканнямі і заўвагамі па маёй дзейнасці не сутыкаўся, – адзначыў заяўнік. – Таксама я перакананы, што ў дакладной запісцы адкрытая мана.

Дзмітрый Алейнікаў даручыў стварыць незалежную камісію для аналізу сітуацыі.

Муж гамяльчанкі Людмілы Мікалаеўны ўжо паўтара года змагаецца з анкалогіяй. Жанчына мяркуе, што стан мужа толькі пагаршаецца з-за няправільных спосабаў аказання дапамогі.

– Займаюся лячэннем мужа, ваджу па розных медыцынскіх установах, – падзялілася Людміла Мікалаеўна. – Лічу, што яму памылкова дыягнасціравалі від анкалогіі, адпаведна, праводзіцца няякаснае лячэнне.

Жанчына папрасіла індывідуальна разгледзець медыцынскую карту мужа.

– Я вас пачуў, яшчэ раз усё праверым, паспрабуем разабрацца аператыўна, – адказаў намеснік старшыні аблвыканкама.

Аляксандр Уладзіміравіч і Кацярына Ігараўна лічаць, што рашэннем раённага выканаўчага камітэта ў іх незаконна забралі трох дзяцей. Па версіі камісіі па справах непаўналетніх бацькі не клапаціліся аб стане здароўя дзяцей. Дзмітрый Алейнікаў распарадзіўся азнаёміцца з прадстаўленымі дакументамі і даць ацэнку сітуацыі.

Гамяльчанін Аляксандр Іванавіч паскардзіўся на ўзровень дапрызыўнай падрыхтоўкі моладзі на Гомельшчыне.

– Нельга чаму-небудзь навучыць чалавека без практычнага блока, таму вучэбна-метадычныя зборы – важная частка патрыятычнага выхавання. Гэтым трэба займацца больш актыўна, – лічыць мужчына. Ён таксама прапанаваў змяніць размяшчэнне Гомельскага кадэцкага вучылішча і зрабіць надбаўку настаўнікам за працу па кантракце. Дзмітрый Алейнікаў узяў усе пытанні на кантроль.