Гамяльчанін Мікалай Драбышэўскі прапанаваў назваць адну з вуліц Гомеля імем двойчы Героя Савецкага Саюза маршала Івана Ігнатавіча Якубоўскага.

– Ён быў двойчы паранены, унёс вялікі ўклад у перамогу ў Вялікай Айчыннай вайне, займаў адказныя дзяржаўныя пасады, – адзначыў Мікалай Аляксандравіч. – Я не магу заставацца абыякавым.

Намеснік старшыні аблвыканкама адзначыў, што змяніць ужо зацверджаныя назвы вуліц складана, але наш горад рэгулярна абнаўляецца і змяняецца. Таму пры з'яўленні новай вуліцы ініцыятыва Мікалая Аляксандравіча будзе разглядацца як адзін з прыярытэтных варыянтаў.

– Падтрымліваю вашу ідэю, у наш час трэба рабіць упор на ваенна-патрыятычнае выхаванне моладзі, – дадаў Дзмітрый Алейнікаў.

Жыхар пасёлка Забіяка Гомельскага раёна Аляксандр Сарыевіч паскардзіўся на якасць аказання медыцынскай дапамогі ў Красненскім сельсавеце. Паводле яго слоў, у мясцовай аптэцы пералік лекавых прэпаратаў вельмі малы, а рэгістратура паліклінікі працуе толькі да 15.00. Таксама Аляксандр сцвярджае, што ў абноўленым корпусе Гомельскай гарадской клінічнай бальніцы хуткай меддапамогі, паводле праектна-каштарыснай дакументацыі, павінна размяшчацца аптэка, але яе няма. А існуючы буфет адрозніваецца ад дакументальна заяўленага раней. Намеснік старшыні аблвыканкама звярнуў увагу грамадзяніна, што праектна-каштарысная дакументацыя пры неабходнасці дапускае змяненні, інакш аб'ект немагчыма прыняць у эксплуатацыю, а аптэка функцыянуе згодна з першапачатковым планам. Астатнія звароты мужчыны ўзяты на кантроль.

Гамяльчанка Лілія Пейсахаўна незадаволеная працай тэрытарыяльнага цэнтра сацыяльнага абслугоўвання насельніцтва. Пенсіянерка наракае на невыкананне супрацоўнікамі сваіх службовых абавязацельстваў пачынаючы з 2014 года. Дзмітрый Алейнікаў запэўніў, што разбярэцца ў сітуацыі.