Гамяльчанка Ксенія Валянцінаўна першай прыйшла на прыём, каб паскардзіцца на няякасны рамонт даху. Пяціпавярховы дом пабудаваны ў пачатку 2000-х, ужо тры разы рэстаўравалі дах, але той перыядычна працякае.

– У 2023-м прыйшлося зноў звяртацца ў кампетэнтныя службы для выканання рамонтных работ, – распавяла пенсіянерка. – У канцы мінулага года была адліга, зноў выявіла тры плямы. Вельмі стамілася хадзіць па розных інстанцыях з маёй праблемай, якую некалькі гадоў не атрымоўваецца ўстараніць.

Андрэй Бараноўскі паабяцаў даць ацэнку дзеянням адказных асоб. Рашэнне пытання пад кантролем да поўнага выканання работ.

З падобнай сітуацыяй звярнулася Наталля Іванаўна з абласнога цэнтра. Па словах жанчыны, яе ўчастак падтапляе ўжо больш за 30 гадоў. Вада стаіць пад домам, амаль дасягнула ўзроўню падлогі.

– Нас пастаянна падтапляе, а гарадскія ўлады не могуць вырашыць праблему, – скардзіцца Наталля Іванаўна.

Андрэй Бараноўскі падкрэсліў, што адпампоўванне вады ажыццяўляецца толькі ў тым выпадку, калі яе ўзровень перавышае падлогу жылля. І тады ёсць магчымасць выдзеліць пацярпеламу часовае жыллё.

– Абследаваны ўсе водныя каналы горада і вобласці, інфармацыя перададзена меліярацыйным кампаніям, – растлумачыў жанчыне намеснік старшыні аблвыканкама. – Топіць не толькі вас, мы прынялі рашэнне комплексна вырашаць гэту праблему. Усім адказным асобам тэрмінова выехаць на месца і разабрацца ў сітуацыі.

Крысціна Уладзіславаўна валодае паловай дома ў пасёлку Сож. Уласнік другой часткі зараз пражывае ў Чачэнскай Рэспубліцы, быў дэпартаваны ў Расію з-за заканчэння пасведчання на права жыхарства.

– Тая частка дома ў жудасным стане, а мы нічога не можам зрабіць, – занепакоена жанчына. – Мне параілі звярнуцца ў суд, але для гэтага неабходна ацэначны кошт дома і падрыхтаваць тэхпашпарт. Што немагчыма без другога ўласніка.

Намеснік старшыні аблвыканкама распарадзіўся падаць усе матэрыялы ў юрыдычны аддзел аблвыканкама, даць прававую ацэнку і паведаміць Крысціне Уладзіславаўне алгарытм дзеянняў.