Гэта прамысловае прадпрыемства выбрана не выпадкова. Роўна год таму на ЗЛіН адкрылі філіялы кафедраў "Металургія і тэхналогіі апрацоўкі матэрыялаў" і "Тэхналогія машынабудавання" ГДТУ імя П. В. Сухога.

У падрыхтоўцы маладых кадраў гэта дазваляе зрабіць упор на практыку. Хлопцы на свае вочы бачаць вытворчы працэс, за кожным з іх замацоўваюць вопытнага настаўніка.

Як падкрэсліў намеснік старшыні аблвыканкама Дзмітрый Алейнікаў, тэма падрыхтоўкі маладых кадраў цяпер вельмі актуальная. І менавіта цеснае ўзаемадзеянне вну і прадпрыемстваў дазваляе выпусціць з навучальнай установы патрэбных рэгіёну спецыялістаў высокага класа.

– Акрамя асноўнай работы я з'яўляюся выкладчыкам ГДТУ імя П. В. Сухога. Адкрыццё ўніверсітэцкіх кафедраў на вытворчасці дапамагае студэнтам вызначыцца з накірункам, у якім яны будуць потым працаваць. Старшакурснікі знаёмяцца з сучаснымі тэхналогіямі на вытворчасці, якія проста неабходны для іх далейшай прафесійнай дзейнасці, – расказаў начальнік тэхналагічнага бюро нарыхтоўча-прэсавага цэха ЗЛіНа Аляксандр Швецоў. – Узаемадзеянне паміж універсітэтам і прадпрыемствам рэальнага сектара эканомікі прыносіць свой плён – амалоджваюцца кадры. І, што вельмі важна, прыходзячы на завод, маладыя супрацоўнікі ўжо знаёмы з вытворчымі тэхналогіямі, якія сёння так імкліва развіваюцца.

Як адзначыў першы прарэктар БелДУТа Юрый Самадум, вну вельмі шчыльна працуе з заказчыкамі кадраў, без узгаднення з якімі не будзе рэалізаваны ні адзін навучальны план. Групы, у якія ўваходзяць прадстаўнікі ўніверсітэта і Беларускай чыгункі, сумесна распрацоўваюць напрамкі, патрэбныя маладым спецыялістам для рэалізацыі іх прафесійнага майстэрства. У выніку моладзь атрымлівае веды, якія спатрэбяцца ў рабоце. Вну спрыяе і таму, каб студэнцкія практыкі былі аплачваемымі. Гэта прывівае адказнасць за працу і якасць работы.

На пасяджэнні абмеркавалі таксама актуальнасць інжынерных класаў, прафарыентацыю школьнікаў, навучанне ў вну па мэтавым дагаворы.