На пасяджэнні аблвыканкама абмеркавалі рэалізацыю Дырэктывы № 1 і гатоўнасць устаноў адукацыі да навучальнага года

У цэнтры ўвагі пытанні працоўнай дысцыпліны і вытворчага траўматызму. Вёў пасяджэнне старшыня абласнога выканаўчага камітэта Іван Крупко.

Выразны алгарытм для п'яніц

У вобласці назіраецца скарачэнне колькасці людзей, якія загінулі на вытворчасці і ад злачынных дзей. Аднак больш смерцяў ад утаплення і на пажарах у параўнанні з тым жа перыядам мінулага года. Загінуўшых у ДТЗ – столькі ж.

А вось за 20 мінулых гадоў карціна куды пазітыўней: колькасць жыхароў рэгіёна, якія загінулі ад знешніх фактараў, скарацілася да паказчыка 2004 года ўтрая.

Зразумела, забеспячэнне бяспекі жыццядзейнасці грамадзян застаецца прыярытэтнай задачай для органаў улады на ўсіх узроўнях. Як было падкрэслена, няма нічога каштоўней чалавечага жыцця. Нават калі трагедыі адбываюцца па віне саміх пацярпелых, меры прымаюцца неадкладна ва ўсіх арганізацыях. Такія выпадкі старанна расследуюцца, аналізуюцца, распрацоўваюцца прафілактычныя мерапрыемствы.

Асобна закранулі тэмы вытворчага траўматызму. Яго ўзровень у першым паўгоддзі знізіўся з 93 да 78 выпадкаў, скарацілася і колькасць загінулых (11 і 5). Рост колькасці цяжка траўміраваных адбыўся ў Гомельскім, Петрыкаўскім, Рэчыцкім, Рагачоўскім раёнах, Чыгуначным раёне Гомеля. Нулявы траўматызм зафіксаваны ў Брагінскім, Веткаўскім, Кармянскім, Лоеўскім, Кастрычніцкім, Чачэрскім раёнах.

Два работнікі, якія атрымалі траўмы, былі нецвярозымі. Адзін з іх загінуў. П'янства застаецца бічом, мабільныя групы рэгулярна выяўляюць асоб на працоўных месцах (у студзень – чэрвені – 13 фактаў, у тым жа перыядзе 2023-га – 21).

Іван Крупко нагадаў аб выразным алгарытме прыняцця мер да п'яніц на вытворчасці. Іх нельга проста журыць, якімі б неацэннымі кадрамі яны ні былі. Трапіўся на рабочым месцы – павінен быць звольнены, кропка. Да адказнасці прыцягваюцца і яго кіраўнікі, гэта агульнае правіла.

Таксама разрыў працоўных адносін з чалавекам павінен прытрымлівацца і пасля фактаў крадзяжоў на вытворчасці, нават самых дробных.

Павышаную ўвагу даручана надаць ахове работы і тэхніцы бяспекі на жывёлагадоўчых фермах. Справа ў частых выпадках траўміравання работнікаў жывёламі. Акрамя таго, кантралюючыя органы і спецыялісты правераць стан дзіцячых атракцыёнаў у парках адпачынку. Якія не адпавядаюць нормам бяспекі аб'екты, закрыюць і дэманціруюць без прамаруджванняў.

Бяспека ў агні і вадзе

У першым паўгоддзі адбылося 489 пажараў, ільвіная доля – у жылым фондзе. Процідзейнічаць гэтай бядзе закліканы ўсе суб'екты прафілактыкі. Праводзяцца маніторынгі, рэйды, падамавые абыходы. У арганізацыях ўсталёўваюцца сістэмы пажарнай сігналізацыі і аўтаматыкі. Разам з тым, шэраг буйных аб'ектаў, у тым ліку будынкаў інтэрнатаў у вобласці па-ранейшаму не падключаны да такіх сістэм. Дзе-нідзе яны ёсць, але няспраўныя. Пастаўлена задача паэтапна ўвесці ў строй усе гэтыя ўстаноўкі, названы тэрміны.

Акрамя таго, неабходна абмежаваць доступ у безгаспадарныя будынкі і збудаванні, забяспечыць іх знос у рамках графіка.

Гінуць людзі і на вадзе, у студзені – чэрвені патанулі 24 жыхары рэгіёна, восем з іх былі нецвярозымі. За гэты час работнікі выратавальных станцый выратавалі 26 чалавек, у тым ліку 11 непаўналетніх. Важны момант: на пляжах са станцыямі і пастамі ратавальнікаў не адбылося ніводнага выпадку ўтаплення. Работа па недапушчэнні нашых грамадзян у несанкцыянаваныя для купання месцы будзе працягнута.

Пры гэтым, як адзначыў старшыня аблвыканкама, санкцыянаваныя і даступныя пляжы павінны быць у кожным раёне. Яны абавязаны задавальняць асноўныя патрэбы адпачываючых. Не дзве купіны пяску і пару грыбкоў ад сонца, як было сказана, а сапраўды акультураныя, добраўпарадкаваныя і бяспечныя зоны адпачынку.

 200 тысяч пойдуць грызці граніт навукі

На Гомельшчыне 2 верасня расчыняць дзверы 1118 устаноў адукацыі. 1112 з іх атрымалі дазвольныя дакументы, прыёмка завяршаецца. Дзесьці яшчэ працягваюцца работы на дахах будынкаў, іх плануюць скончыць у лічаныя дні.

Дзень ведаў сёлета адзначаць каля 200 тысяч школьнікаў і прадстаўнікоў студэнцкай моладзі, з іх больш за 15 тысяч пойдуць у першы клас.

Як падкрэсліў Іван Крупко, у пытаннях падрыхтоўкі сферы адукацыі няма другарадных тэм, важна ўсё – ад забеспячэння бяспекі да харчавання і адзення для дзяцей з малазабяспечаных сем'яў.

Дарэчы, з гэтага навучальнага года ў школах пачне дзейнічаць новае меню, для яго распрацавана больш за 300 страў. І справа не толькі ў пераліку смачнасцяў – пад меню праведзены рамонты і рэканструкцыі харчовых блокаў, закуплена абсталяванне, падабраны дадатковыя кадры.

Пытанням бяспекі – асаблівая ўвага, гэта тычыцца аўтаномных пажарных сігналізацый,"трывожных кнопак" (поўны ахоп), камер відэаназірання (99%), ліквідацыі дарожных дэфектаў, ўстаноўкі элементаў безбар'ернага асяроддзя і іншых мер.

Практычна вырашана пытанне з падвозам дзяцей да школ: аўтобусаў і вадзіцеляў хапае.

У рабоце пасяджэння прынялі ўдзел памочнік Прэзідэнта – інспектар па Гомельскай вобласці Юрый Горлаў, старшыня абласнога Савета дэпутатаў Кацярына Зянкевіч.