Рамонтныя работы ў гарадскім цэнтры культуры Жыткавіч праводзяцца з 2011 года. Сродкі выдзяляліся ў тры этапы. Аднак у 2017 годзе фінансаванне прыпынілася.

У той жа час частка работ па абсталяванні пажарнай сігналізацыі патрабавала завяршэння. Разумеючы сацыяльнае значэнне аб'екта і важнасць яго для жыхароў раённага цэнтра, сёлета старшыня аблвыканкама Іван Крупко прыняў рашэнне аб выдзяленні з абласнога бюджэту сродкаў на рэканструкцыю.

Аднак у сувязі са змяненнямі ў заканадаўстве ўзнікла пытанне асваення грашовых сродкаў, патрабуецца ўнясенне змяненняў у праектную дакументацыю, яе дапрацоўка.

ГЦК быў пабудаваны ў 1979 годзе. Калі змяніліся патрабаванні пажарнага нагляду, у 1994-м эксплуатацыя аб'екта была прыпынена. Раён вялікі, тут пражывае амаль 36 тысяч чалавек, таму ўстанова культуры агульнай умяшчальнасцю 520 глядзельных месцаў неабходна.

– Падчас капітальнага рамонту з элементамі мадэрнізацыі зроблена сістэма пажаратушэння, праведзены электрыфікацыя і аўтаматызацыя, добраўпарадкаванне. Узмоцнены апорныя канструкцыі, заменены элементы сцэнічнага абсталявання, абноўлены фасад, – расказаў журналістам старшыня Жыткавіцкага райвыканкама Мікалай П'яўко.

Змяніліся холы, з'явілася зала ўрачыстасцей і бібліятэка, абноўлены кабінеты для заняткаў.

Каб поўнасцю ўвесці ў эксплуатацыю аб'ект, неабходна завяршыць работы па мантажы сістэмы сцэнічнага пажаратушэння, сістэмы вентыляцыі, таксама выканаць рамонт даху і знадворную афарбоўку.

Рэалізацыя праекта застанецца на кантролі старшыні аблвыканкама Івана Крупко.