Да святкавання значнай даты для брацкіх народаў далучыліся дэлегацыі Бранскай і Арлоўскай абласцей.

Народныя традыцыі і асновы ўзаемадзеяння ў сферы культуры – пра ўсё гэта расказала выстава рамеснікаў з дзвюх краін "Калі мы разам, мы адзіныя".

Непарыўную сувязь і пераемнасць пакаленняў пацвердзіла канцэртная праграма ад калектываў з Беларусі і Расіі.

– Тысячы нітак звязваюць беларускія і расійскія прадпрыемствы. Яшчэ больш трывалыя – брацкія сувязі жыхароў нашых краін, – падкрэсліў старшыня аблвыканкама Іван Крупко падчас урачыстага сходу да Дня яднання народаў Беларусі і Расіі.

Двухбаковае супрацоўніцтва паміж Гомельскай вобласцю і расійскімі рэгіёнамі ўключае 37 дагавораў. Яшчэ 89 пагадненняў рэалізуюцца гарадамі і раёнамі вобласці з адміністрацыйнымі расійскімі ўтварэннямі, назваў лічбы губернатар. На тэрыторыі рэгіёна зарэгістравана 450 прадпрыемстваў з расійскім капіталам.

– Наша вобласць актыўна ўцягнута ў інтэграцыйную дзейнасць. Узаемная эканамічная выгада неаддзельная ад гуманітарнага складніка, які задае маральны камертон адносінам, – адзначыў Іван Крупко.

Да віншаванняў беларускага калегі далучыліся губернатар Бранскай вобласці Аляксандр Багамаз, губернатар Арлоўскай вобласці Андрэй Клычкоў. Гледачы ўбачылі і відэазвароты ад кіраўнікоў іншых рэгіёнаў.