Фестываль стаў добрай традыцыяй, стварае ўмовы для раскрыцця і рэалізацыі творчага патэнцыялу людзей з інваліднасцю, спрыяе сацыялізацыі.

Старшыня праўлення Гомельскай абласной арганізацыі грамадскага аб'яднання "Беларускае таварыства інвалідаў" Васілій Папкоў адзначае, што з кожным годам мерапрыемства пашырае творчыя гарызонты, а галоўнае – адсутнасць узроставага цэнзу, галоўнае – талент. Пераможцаў вызначаць у 13 намінацыях, у тым ліку па дэкаратыўна-прыкладной творчасці, вакале, харэаграфіі, інструментальным выкананні. 

Запомніўся 77-гадовы Мікалай Дайнека з тульскім гармонікам, які сыграў пад гучныя апладысменты папуры з вядомых народных песень. «Я самавучка, іграю з шасці гадоў, а яшчэ вершы пішу на рускай і беларускай мовах. Творчасць натхняе, для мяне гэта ўсё жыццё», – прызнаецца ён.

Адзін з самых юных удзельнікаў – 12-гадовы Аляксей Варанкоў з вакальнай студыі «ДеМо» Гомельскага гарадскога цэнтра інклюзіўнай культуры падрыхтаваў на конкурс некалькі песень. "Люблю спяваць, натхняюць апладысменты гледачоў. Нават губернатару на адным з конкурсаў спадабалася выкананне, і ён паціснуў мне руку, – расказвае хлопчык.

Прыкоўвала ўвагу выстава народных умельцаў з Рэчыцы, Мазыра, Гомеля, Хойнікаў, Калінкавічаў, вырабы ручной работы здзіўлялі і захаплялі. 

Усе ўдзельнікі – людзі дзіўнай сілы волі, з жаданнем тварыць і дэманстраваць майстэрства свету. Іх аб'ядноўвае бязмежная любоў да творчасці, бо гэта не проста захапленне, а частка жыцця.

Конкурс прымеркаваны да Міжнароднага дня інвалідаў і 35-годдзя грамадскага аб'яднання «Беларускае таварыства інвалідаў».