Наталля Валянцінаўна з Кармы папрасіла ўладкаваць пешаходныя дарожкі і дадатковыя парковачныя месцы ў двары свайго дома. Аднак тэрыторыя для гэтага вельмі вузкая, патлумачылі спецыялісты мясцовага райвыканкама. Кіраўнік рэгіёна праінспектуе двор асабіста. 

З Маладзёжнага мікрараёна Буда-Кашалёва датэлефанаваліся адразу некалькі чалавек і папрасілі, каб запусцілі цэнтральную каналізацыю, да якой маглі б падключыцца ўладальнікі індывідуальных жылых дамоў. Разгорнуты адказ жыхарам мікрараёна дадуць на агульным сходзе пасля таго, як абследуюць каналізацыйна-помпавую станцыю.

Людміла Паўлаўна з аграгарадка Літвінавічы Кармянскага раёна папрасіла паспрыяць у продажы трох бычкоў. Іван Крупко запэўніў, што ў найбліжэйшы час з жанчынай звяжуцца прадстаўнікі мясакамбінатаў. 

Жыхарка Кармы Ніна Рыгораўна выказала падзяку старшыні аблвыканкама за добраўпарадкаванне гарпасёлка. Маладую шматдзетную маці асабліва радуе з'яўленне дзіцячых пляцовак, спартзалы, лыжаролернай трасы і іншых сацыяльных аб'ектаў.