За дзве гадзіны да старшыні аблвыканкама Івана Крупко звярнуліся чатыры жыхары вобласці. Пытанні задавалі самыя розныя: зямельныя спрэчкі, сфера ЖКГ, афармленне дакументаў на домаўладанне, вылучэнне ўчастка.

Правесці новую лінію электраперадачы да свайго дома ў пасёлку Каранёўка Гомельскага раёна просіць мясцовы жыхар. Алег Аляксандравіч растлумачыў, што з 1970-х гадоў святло паступала ад дзяржаўнага прадпрыемства, якое некалькі гадоў, як ліквідавана. Яго выкупіў прыватны прадпрымальнік, які плануе знесці электравышку з-за яе зношанасці.

– У гэтым пытанні трэба сур'ёзна разабрацца. Паглядзець, што могуць зрабіць энергетыкі, прыватнае прадпрыемства і самі спажыўцы. Падзяліць паміж імі адказнасць і знайсці варыянт падключэння электраэнергіі. Зварот пакідаем на кантролі, пакуль праблема не вырашыцца, – рэзюміруе кіраўнік рэгіёна. 

Гамяльчанка Вольга Віктараўна не згодная з некаторымі пунктамі ў дакументах на домаўладанне і ўпэўнена, што кадастравая служба дапусціла дзве тэхнічныя памылкі. Са сцвярджэннем землеўпарадчыкі не згодныя. Выхад адзін, ставіць кропку ў спрэчцы Іван Крупко: выехаць яшчэ раз камісійна на месца, правесці паўторны замер. Уласніца ў выпадку нязгоды з вынікамі праверкі мае права звярнуцца ў надзорныя органы або ў суд.