Падпісана пагадненне на 2024–2026 гады паміж галоўным упраўленнем жыллёва-камунальнай гаспадаркі аблвыканкама і абласным камітэтам Беларускага прафсаюза работнікаў мясцовай прамысловасці і камунальна-бытавых прадпрыемстваў.

Пагадненне служыць асновай пры заключэнні калектыўных дагавораў з работнікамі арганізацый ЖКГ Гомельшчыны. У ім закладзены ўмовы для стварэння якаснай і прадукцыйнай працы, забеспячэння ўстойлівага эканамічнага і фінансавага стану прадпрыемстваў, павышэння канкурэнтаздольнасці прадукцыі, тавараў, работ і паслуг. Ёсць пункты, якія датычацца ўзроўню заработнай платы, стварэння здаровых і бяспечных умоў працы і побыту на вытворчасці, арганізацыі культурна-масавай і фізкультурна-аздараўленчай работы.

– У дакумент дадалі шэраг пунктаў, якія закранаюць інтарэсы моладзі, – адзначае старшыня абласной арганізацыі Беларускага прафсаюза работнікаў МПіКБП Уладзімір Таргоня. – Бакі сацыяльнага дыялогу жадаюць зацікавіць маладых людзей работай на нашых прадпрыемствах. Для тых, хто прызваны на ваенную службу і вярнуліся пасля яе заканчэння на ранейшае месца работы, прадугледжана аказанне аднаразовай матэрыяльнай дапамогі ў памеры не менш як 20 базавых велічынь. Пагадненне таксама прадугледжвае абавязковае ўкараненне ў арганізацыях палажэння аб настаўніцтве і замацаванні за маладымі спецыялістамі, маладымі рабочымі вопытных работнікаў, меры матэрыяльнага стымулявання і маральнага заахвочвання.