Таленавітых студэнтаў, педагогаў і работнікаў галіны ўшаноўвалі ў Палацы Румянцавых і Паскевічаў.

Уладальнікамі дыпломаў і прэмій сталі пераможцы абласнога конкурсу сярод маладых вучоных і аўтараў эксперыментальных распрацовак за праведзеныя навуковыя даследаванні ў галіне прыродазнаўчых, тэхнічных, гуманітарных і грамадскіх навук. Узнагароды атрымалі таксама навуковыя калектывы і ўстановы адукацыі, якія займаюцца інавацыйнай дзейнасцю.

Гэта свята і зусім юных рацыяналізатараў, і даследчыкаў, якія паспяхова рэалізуюць свае распрацоўкі ў конкурсе "100 ідэй для Беларусі", і вопытных даследчыкаў, падкрэсліў старшыня аблвыканкама Іван Крупко:

– Усім прысутным – наша падзяка. Будзе моцнай навука – будзе і тэхналагічны прарыў, і сучасныя вытворчасці, і высокая культура, і здаровае грамадства.

Да маладых перспектыўных вучоных на Гомельшчыне стаўленне асаблівае, якое знайшло адлюстраванне ў тым ліку ва ўстанове спецыяльнай штогадовай прэміі аблвыканкама. За амаль чвэрць стагоддзя існавання яе ўладальнікамі сталі каля 230 маладых вучоных і спецыялістаў. Якасная адукацыя, практычны вопыт і падтрымка на рабочым месцы – залог поспеху рацыяналізатараў ва ўсіх сферах, адзначыў губернатар.

Антыбактэрыяльнае пакрыццё для сасудзістых пратэзаў, экспрэс-метад дыягностыкі дрэў хвоі, тэхналогія вытворчасці гарачакачанай бунтавай арматуры – дапытлівыя розумы Гомельшчыны займаюцца распрацоўкамі ў самых розных галінах. І ў кожнай дасягаюць важкіх поспехаў.

– Інвестыцыі ў навуку – ключавая ўмова дабрабыту нашай краіны. Многае ў нас робіцца для падтрымкі вучоных, а беларускае грамадства прыняло інавацыйны шлях развіцця. І асабліва важна ў пяцігодку якасці ўкараніць навуковыя распрацоўкі ў вытворчасць, – падкрэсліла на ўшанаванні член Савета Рэспублікі, старшыня абласнога Савета дэпутатаў Кацярына Зянкевіч.

Сваіх уладальнікаў знайшлі і ўзнагароды Нацыянальнай акадэміі навук Беларусі, Міністэрства аховы здароўя, Гомельскага гарадскога і раённых выканкамаў.