На Рэчыцкім праспекце побач са скверам знаходзіцца храм Архангела Міхаіла, перанесены ратавальнікамі з чарнобыльскай зоны адчужэння. Ён стаў духоўным цэнтрам і сімвалам адраджэння.

Як падкрэсліў Іван Крупко, сквер Ратавальнікаў – адзіны ў Беларусі, гарманічна дапоўніў гэты жывы летапіс. У цэнтры сквера – скульптурная кампазіцыя, прысвечаная героям Чарнобыля.

– Ваша служба – школа жыцця, дзе не вучаць быць героямі, але штодня фарміруюць характар. Сквер, які мы адкрылі, не толькі месца адпачынку, гэта месца памяці і падзякі, – адзначыў губернатар.

Міністр па надзвычайных сітуацыях Вадзім Сіняўскі павіншаваў усіх супрацоўнікаў МНС з Днём пажарнай службы Рэспублікі Беларусь.

Кіраўнік ведамства расказаў пра доўгую і славутую гісторыю службы ў нашай краіне і выказаў словы падзякі за ўвекавечанне памяці аб лепшых прадстаўніках мужнай прафесіі. Вадзім Сіняўскі адзначыў, што ў цяжкія для краіны перыяды, гады Вялікай Айчыннай вайны, пры ліквідацыі наступстваў чарнобыльскай катастрофы пажарныя і ратавальнікі праяўлялі адвагу і гераізм, абараняючы сваіх землякоў, мір і спакой на роднай зямлі.

– Няхай гэты сквер стане знакавым месцам – цэнтрам прыцягнення для гамяльчан, гасцей горада і сімвалам удзячнай памяці пра герояў-ратавальнікаў, – падкрэсліў міністр.

Архіепіскап Гомельскі і Жлобінскі Стэфан правёў абрад асвячэння новай зялёнай зоны горада над Сожам.

У гэты дзень таксама адбылося ўзнагароджанне работнікаў органаў і падраздзяленняў МНС на Гомельшчыне, прадстаўнікоў іншых ведамстваў і галін.