Павіншаваць педагогаў і навучэнцаў прыехаў старшыня аблвыканкама Іван Крупко.

– Педагогі фарміруюць асобу, вучаць верыць у свае сілы, любіць Радзіму. Дзякуй вам за гэта! Для таго, каб работа настаўнікаў і заняткі дзяцей былі камфортнымі, мы будуем новыя ўстановы адукацыі, мадэрнізуем існуючыя аб'екты, – адзначыў губернатар. – Гімназія славіцца музычным профілем, а юныя таленты праслаўляюць вобласць на рэспубліканскіх і міжнародных харэаграфічных конкурсах. Таму прынялі рашэнне ўдыхнуць у гэты будынак новае жыццё. За дзецьмі будучыня! Упэўнены, што ўтульныя залы і прафесійныя педагогі дадуць магчымасць раскрыцца новым талентам, развіваць творчыя здольнасці дзяцей.

На рэалізацыю праекта па пераабсталяванні прыбудовы веткаўскай гімназіі пад новы комплекс для творчасці было выдзелена каля 1,5 мільёна рублёў. 

Ва ўстанове адукацыі больш за дваццаць гадоў працуе ўзорная дзіцячая вакальная студыя «ФарСі», вакалісты якой штогод становяцца пераможцамі абласных, рэспубліканскіх і міжнародных творчых конкурсаў, уладальнікамі прэзідэнцкіх прэмій і стыпендый. Сучасны, абсталяваны па апошнім слове тэхнікі музычны клас педагогам і дзецям быў проста неабходны. Сёння яны атрымалі ўтульную прастору для заняткаў. 

Харэаграфічныя залы таксама будуць запатрабаваныя. У зале для малодшых ужо займаюцца навучэнцы пачатковых класаў, адточваюць майстэрства і развучваюць новыя рухі. У зале для старэйшых рэпеціруюць вальс будучыя выпускнікі. Юным танцорам на працягу дня даюць майстар-класы заслужаныя і знакамітыя артысты.