Больш як 12,7 тыс. чалавек атрымалі падарункі ў час дабрачыннай кампаніі "Ёлка жаданняў"

У ходзе дабрачыннай кампаніі "Ёлка жаданняў - 2023", якая праходзіла ў Беларусі з 7 снежня па 15 студзеня, Беларускі Чырвоны Крыж павіншаваў і перадаў навагоднія падарункі 12720 атрымальнікам, у тым ліку 3190 пажылым людзям. Аб гэтым БЕЛТА паведамілі ў БЧК.

"Быў аб’яўлены збор сродкаў для далейшага набыцця падарункаў. Фізічныя і юрыдычныя асобы перадалі звыш Br52,2 тыс. (у тым ліку ў "натуральным выглядзе")", - расказалі ў БЧК.

Работнікі і валанцёры арганізацыі ў перыяд навагодніх свят наведалі дзяцей, якія знаходзяцца ў сацыяльна небяспечным становішчы, з інваліднасцю і іншымі захворваннямі, дзяцей з сем’яў бежанцаў і вымушаных мігрантаў з Украіны, іншых дзяцей з сем’яў з нізкім узроўнем даходу. Для іх арганізоўваліся шматлікія святы і канцэрты. Дзецям перадаваліся як адрасныя падарункі - тыя, якія дзеці загадзя пазначалі ў спецыяльных паштоўках, так і ўніверсальныя, з улікам узросту і захапленняў.

"Усё гэта стала магчымым дзякуючы дапамозе неабыякавых беларусаў, спонсараў, якія імкнуцца аказаць пасільную дапамогу слабаабароненым катэгорыям грамадзян", - дапоўнілі ў БЧК.